DILI, 04 setembru 2023 (TATOLI)-Koordenadór Organizasaun Nasaun Unidu (ONU) nian iha Timor-Leste, Funmi Balogum, segunda ne’e, hasoru Xefe Estadu, José Ramos Horta hodi diskute kona-ba partisipasaun Timor-Leste nian iha asembleia jerál ONU no simeira Objetivu Dezenvolvimentu Sustentavel (ODS) ba dala-77 iha Nova-Iorke iha semana oin.
“Enkontru Prezidente Repúblika ho ami ne’e hodi diskute kona-ba sesaun asembleia jerál Nasoens Unidas ba dala-77 no simeira ODS iha Nova-Iorke ne’ebé sei akontese iha loron 17 Setembru semana oin mai,” dehan Funmi ba jornalista-sira iha Palásiu Prezidensiál Bairro-Pité Dili.
Notísia Relevante :PR Horta aprezenta situasaun rai-laran no globál iha asembleia jerál ONU
Nia hateten enkontru ne’e hodi hetan opiniaun balun hosi Prezidente Repúblika liga ho kompromisu Timor-Leste nian atu atinji ba objetivu ODS no mós papél Nasaun Unidu ninia apoiu sira ba dezenvolvimentu TL.
“Ami mós ko’alia kona-ba programa no prióridade governu nian hodi aselera esforsu sira atu atinji ODS. Prezidente Repúblika ko’alia kona-ba pontu importante rua hanesan má-nutrisaun no stunting ka ra’es badak nune’e hodi foka ba konsolida kampaña kona-ba susu been inan, ijiéne no mortalidade inan,” nia hateten.
Aleinde asuntu rua ne’e, parte rua mós diskute kona-ba seguransa aihan atu oinsá hasa’e produsaun liuhosi dezenvolvimentu setór agrikultura no kadeia aihan nune’e bele loke kampu servsiu ba Timoroan sira.
“Ikus liu ami ko’alia kona-ba finanseira oinsá mak bele buka osan hodi hala’o pograma sira kona-ba oinsá atu atinji ODS, entaun ita sei lori setór investór privadu sira atu mai investe iha setór saúde, edukasaun no seluk tan,” nia dehan.
Notísia Relevante :Ohin, PR Horta dezloka ba Nova Iorke partisipa asembleia jerál ONU
Jornalista: Hortencio Sanchez
Editór : Agapito dos Santos
