OÉ-CUSSE, 21 setembru 2023 (TATOLI) – Jestór sub-rejiaun Nítibe, Teodoro Sila, rekomenda pontu prinsipál haat ba Autoridade Rejiaun Administrativa Espesiál Oé-Cusse Ambeno (RAEOA) presiza konsidera.
Pontu prinsipál haat ne’e, liuliu apoia mobiliáriu ba edifísiu administrasaun Nítibe, rekompensa komunidade afetadu, apoia transporte públiku no aumenta funsionáriu.
“Ohin ita halo termu entrega ba edifísiu administrasaun Nítibe, maibé edifísiu ne’e mós sei mamuk hela, ha’u fiar katak iha tempu badak ita bele ense ona ho fasilidade balu, atubele ajuda ami halo servisu liuliu mobiliáriu,” Teodoro Sila, propoin pedidu ne’e iha serimónia inaugurasaun edifísiu administrasaun Nítibe iha suku Bene-Ufe, kinta ne’e.
Notísia relevante: PNTL Oé-Cusse sensibiliza kn’aar polisiamentu komunitária ba komunidade Nítibe
Tuir mai, hakarak hato’o rekomedasaun, aproveita prezensa Prezidente Autoridade RAEOA, primeiru, katak ita-nia uma-kain hira maka sei hela iha área edifísiu nia laran, maibé sira la ejize katak, ida-ne’e tanba rai propriedade Estadu nian, maibé atu mobiliza muda fatin, entaun presiza duni materiál balu nune’e bele apoia netik sira.
“Ha’u labele dehan tenke sai ona, ne’e orsida dehan ita obriga, maibé ho prosesu, durante ne’e ami halo aprosima, katak bainhira atu muda fatin presiza tulun mós apoia materiál balu atubele halo netik sira-nia uma, iha fatin ne’ebé sira eskola,” nia informa.
Terseiru, rekomendasaun dalaruma importante, ami iha área rurál hasoru problema barak, liu-liu iha ha’u-nia postu administrative Nítibe, tanba ha’u-nia área ne’e luan tebes, suku lima ho distánsia do’ok, maibé ami nafatin atu husu no rekomenda nafatin, bele fasilita netik transporte.
“Tuir nia, tanba durante tinan ida ho balu, ha’u la’o ho ita-nia fasilidade privadu, entaun dalaruma iha servisu balu labele atende tanba iha kestaun ida, dalaruma ha’u labele responde, maibé servisu barak kuaze suku lima, ha’u tenki la’o, tanba ne’e obrigasaun, ha’u-nia responsabilidade nu’udar jestór,” nia katak.
Notísia relevante: RAEOA hatuur fatuk dahuluk ba projetu estrada nasionál Pante Makasar-Nítibe
Rekomendasaun dahaat, nia dehan, funsionáriu hala’o servisu iha administrasaun sub-rejiaun Nítibe, iha na’in-rua de’it, entaun presiza mós kuandu edifísiu halo ona, maibé funsionáriu na’in-rua de’it, dalaruma ba administrasaun de’it.
Tuir nia, durante ne’e iha delegasaun territória funsionáriu sira mai hosi Sekretáriu Rejionál Komérsiu no Indústria na’in-tolu, PNDS, hosi MSSI hamutuk ho parte SAS maibé servisu movél.
“Entaun servisu atu aban bairua atu la’o efetivu, presiza mós iha rekrutamentu para itabele priénse lakunas ka buat ne’ebé dalaruma presiza atu iha,” nia rekomenda.
Hatán ba rekomendasaun hirak-ne’e, Prezidente Autoridade RAEOA, Arsénio Paixão Bano, rekoñese, no presiza responde, tanba ne’e liga direita ba atendimentu públiku iha Nítibe nian.
“Fatin ne’e ita sei estuda, la’ós jestór mesak, superintendente edukasaun sei mai ne’e ita sei halo, agrikultura nian sei mai, para Nítibe bele la’o, inspetór eskolár sira mós sei mai, ne’e ita-nia planu para halo sub-rejionál sira funsiona la’o di’ak,” nia promete.
Tan ne’e iha tinan ne’e autoridade hahú prepara funsionáriu Ami Prontu Servisu (APS) atu halo estajiu profisionál ba futuru,
“Jestór nia preokupasaun no rekomendasaun ita sei haree, atu loke tenderizasaun ba materiál mobiliáriu para tau iha edifísiu ne’e, karta ba uma komunidade sira, ha’u simu ona, agora iha prosesu nia laran,” nia katak.
Notísia relevante:Autoridade Nitibe husu Guvernu konstrui postu UPF iha Fatusobe
Jornalista: Abílio Elo Nini
Editór: Evaristo Soares Martins
