DILI, 25 setembru 2023 (TATOLI)—Membru Parlamentu Nasionál (PN) liuhosi Deputadu bankada Fretilin, António Moniz Calaun, kondena aktu oknum membru Polísia Nasionál Timor-Leste (PNTL) uza arma tiru sidadaun iha munisípiu Lauten foin lalais ne’e.
Notísia Relevante: PNTL investiga ona kazu okum polísia tiru joven iha Lautém
“Ami kondena aktu membru PNTL ne’ebé mak gosta se kilat ba ita-nia sidadaun sira, tanba saida laiha ona solusaun seluk tenke fó kilat musan ba ita-nia sidadaun sira. Husu ba komisaun B atu trata asuntu ne’e ho rigorozu no loke investigasaun profunda hodi fó todan ba membru PNTL ne’ebé halo asaun sira hanesan ne’e,” Deputadu ne’e hateten liuhosi reuniaun plenária PN, segunda ne’e.
Deputada FRETILIN, Helena Martins, mós kondena aktu membru PNTL ne’ebé tiru sidadaun atu bele loke prosesu tuir lei ne’ebé iha.
Deputadu KHUNTO, Luis Roberto, hateten atetude oknum membru polísia ne’ebé mak dala barak sira halo atuasaun, sempre uza rekursu ikus mak sira sente sira-nia vida ameasadu nune’e sira uza arma tiru hakanek tiha joven sira.
“Hakarak husu ba komandu atu bele fó formasaun kle’an ba ita-nia ajente polísia sira hodi sira bele kumpreende didi’ak sira-nia papél ne’e saida. Se hanesan saida mak akontese iha Lospalos, tanba de’it ita-nia joven sira balun ko’alia katak tuda entaun sira responde ho kilat ne’e ladún di’ak,” nia hateten.
Jornalista : Nelson de Sousa
Editór : Cancio Ximenes
