BOBONARO, 26 setembru 2023 (TATOLI) — Abitante sira iha aldeia Omelai, suku Molop, postu administrativu Bobonaro, munisípiu Bobonaro, halerik ba infraestrutura hanesan kondisaun estrada no ponte durante tinan 20-resin.
António Nasimento nu’udar abitante lokál aldeia Omelai, informa, dezde tempu okupasaun Indonézia to’o agora Governu seidauk tau alkatraun ruma no konstrui ponte foun hadi’a fasilita movimentasaun komunidade nian hosi aldeia ba to’o vila.
“Ami-nia preokupasaun boot tebes uluk to’o agora, iha tempu udan mai, estrada ami movimentu ba mai la di’ak, atu asesu ba merkadu ne’e susar tebes ba rai ida-ne’e, tanba estrada ladi’ak, no ponte laiha,” nia informa ba jornalista sira iha Omelai, segunda ne’e.
António subliña, problema refere fó implikasaun ba komunidade, liuliu ferik no katuas no inan-isin rua sira atu asesu ba fasilidade saúde ne’ebé Governu estabelese.
Nia haktuir, to’o agora Governu seidauk estabelese fasilidade saúde iha aldeia ne’e hodi hakbesik atendimentu saúde ba komunidade sira.
“Ami atu konsulta moras ruma, ospitál moos dook, iha tempu udan ami asesu ba saúde araska loos, mota tún liu ba postu saúde Sibuni ladi’ak, ami ba fali postu administrativu Lolotoe vila,” nia katak.
Alexandrina Gomes Maia nu’udar negosiante, haktuir, ho kondisaun ne’e difikulta tebes sira atu sosa sasán nesesidade bázika iha postu Bobonaro Vila, kapitál Maliana no merkadu iha munisípiu Covalima.
“Bailoro ne’e di’ak, maibé udan ne’e ladi’ak, kareta mós la tama, ami sai ba sosa sasán mós ladi’ak,” nia hateten.
Relasiona ho preokupasaun ne’e, Xefe aldeia Omelai, António de Jesus, husu ba IX Governu liuliu Ministériu Obra Públika atu tau atensaun ho sériu hodi konstrui estrada foun no ponte.
Nia rekomenda ba Ministériu Saúde atu harii postu saúde iha aldeia ne’e nune’e komunidade sira labele la’o dook ba to’o Sibuni no Lolotoe vila.
“Ami udan ne’e sai ladi’ak, tanba mota boot, atu ba Bobonaro Vila mós ladi’ak, hakat kedas mota rua ne’e, hosi Omelai ba Bobonaro ne’e distánsia kilómetru rua hanesan ne’e, situasaun sira ne’e halo inan isin rua no ema moras sira araska loos, dalaruma ami bolu pesoál saúde sira mai uma de’it, udan tún entaun araska ona,” nia dehan.
Enkuantu tuir dadus totál abitante iha aldeia Omelai hamutuk 500-resin ho totál uma-kain 114.
Notísia relevante: ME inaugura EBF Omelai Molop
Jornalista : Sérgio da Cruz
Editór : Evaristo Soares Martins
