BOBONARO, 25 setembru 2023 (TATOLI) – Ministériu Edukasaun (ME), Dulce de Jesus Soares, hamutuk ho parseiru Espend It Well Australia, segunda ne’e inaugura Ensinu Báziku Filiál (EBF) Omelai, suku Molop, postu administrativu Bobonaro, munisípiu Bobonaro.
Infraestrutura edukativa ne’e iha Sala aula tolu, sala profesór ida no kompleta ho hariis-fatin lima, bee-moos, meza, kadeira no fasilidade sira seluk tán.
Ministra Edukasaun, Dulce de Jesus Soares, lori Primeiru Ministru, Kayrala Xanana Gusmao, nia naran agradese ba organizasaun Espending Tuel Australia ne’ebé ho laran luak hakarak apoia governu Timor-Leste hodi konstrui eskola refere.
Notísia Relevante:MEJD-Embaixada Japaun inaugura Eskola Bázika Filiál Builico iha Ainaro
“Ha’u hanoin buat sira-ne’e ita kuandu ko’alia, se sein sira, ita-nia forsa la to’o atu halo mesak, tanba ne’e mak iha prosesu dezenvolvimentu ita sempre servisu hamutuk Governu ho setór privadu ho doadór sira, hanesan liman-ain hosi governu atu nune’e bele hatutan saida mak nesesidade povu nian,” Ministra Dulce hateten.
Governante ne’e mós husu ba reponsável eskola atu koopera ho autoridade lokál no komunidade sira atu kuida eskola refere no hadi’ak ambiente sai furak liután.
“Ita-nia parseiru sira ajuda ita halo, governu mós ajuda ita halo, maibé fila-fali ba komunidade sira, ita hotu tenke tau esforsu hamutuk atu kuida infraestrutura ne’ebé mak iha, por ezemplu halo lutu atu nune’e animál labele tama eskola no obra estudante sira-nia labele lakon, ema labele na’ok ni estraga,” nia apela.
Diretora Fundasaun Espend It Well, Crisht Weat, hateten sira harii ona eskola 19 iha Timor-Leste inklui EBF Omelai ho intensaun atu apoia no eleva kualidade edukasaun iha TL.
“Ami fiar katak ita-nia oan sira mak futuru ba Repúblika Demokrátika Timor-Leste, ami hakarak fó edukasaun ba ita-nia oan sira, ami espera imi hotu gosta imi-nia eskola,” Crisht dehan.
Prezidente Autoridade Munisípiu Bobonaro, Ernesto de Oliveira, espera ho estabelesimentu infraestrutura edukativa foun ne’e estudante sira bele aprende no estuda iha fatin ne’ebé dignu.
Nia husu ba jerente eskola sira atu halo jardín, kuda ai-funan no ai-oan sira hodi hamatak ambiente eskola refere.
Eskola refere konstrui iha tinan 2022 ne’ebé hetan apoia hosi parseiru Espend It Well Australia koopera no organizasaun naun governamentál MAHON.
Enkuantu eskola refere sei akumula estudante na’in-117 mai hosi primeiru siklu to’o segundu siklu.
Notísia Relevante:MEJD relata ba PM progresu konstrusaun eskola 92 atu halo inaugurasaun
Jornalista: Sérgio da Cruz
Editór: Evaristo Soares Martins
