DILI, 11 janeiru 2023 (TATOLI)—Ministru Edukasaun Juventude no Desportu (MEJD) Armindo Maia, relata progresu servisu konstrusaun no reabilitasaun eskola sira hosi projetu komunitária hamutuk 92 ne’ebé preparadu ona atu hala’o inaugurasaun iha fulan ida-ne’e.
“Ohin ha’u hasoru ona Primeiru-Ministru hodi informa katak iha ona eskola hamutuk 92 mak preparadu ona atu hetan inaugurasaun maibé ninia data mak seidauk termina,” Governante ne’e hateten ba Agência Tatoli iha Palásiu Governu, kuarta ne’e.
Tuir nia, serimónia inaugura ne’e sei realiza iha janeiru 2023 ne’e sei lansa hosi Xefe Governu Taur Mata Ruak no serimónia inaugurasaun ne’e sei realiza iha munisípiu Baucau ho simbólika depois mak sei halo hosi membru Governu sira iha kada munisípiu sira.
Diretór Nasionál Dezenvolvimentu Parque Eskolár (DNDPE), Agostu Soares, relata katak loloos ne’e prosesu serimónia inaugurasaun ba eskola sira-ne’e realiza ona iha dezembru tinan 2022 maibé Primeiru-Ministru foti ona lisensa anuál, entaun planu inaugurasaun ne’e adia fila-fali ba janeiru 2023.
Maibé, nia dehan, iha ona planu inaugurasaun ne’ebé sei realiza iha eskola Ensinu Báziku Sentrál (EBC, sigla portugés) ida iha Baucau ne’e sei akontese iha semana ida-ne’e no Xefe Governu rasik mak sei inaugura depois mak sei fó mós orientasaun ba ministru sira atu halo mós inaugurasaun ba eskola sira seluk iha munisípiu sira.
Jornalista : Tomé Amado
Editór : Cancio Ximenes
