DILI, 26 setembru 2023 (TATOLI) – Sentru impresaun iha Comoro aprezenta ona pedidu ba Diresaun Aprovizionamentu Ministériu Edukasaun (ME) atu aselera prosesu akizisaun ba suratahan hodi bele prodús kaderneta eskolár, maibé daudaun seidauk hetan resposta.
Sekretáriu Estadu Edukasaun, Ensinu Sekundáriu no Eskola Téknika, Domingos Lopes Lemos, hatete prosesu aprovizionamentu Ministériu Edukasaun nian ba apoia suratahan ne’e maka tarde, tanba ne’e sentru halo de’it impresaun ba kaderneta balun hodi distribui ba eskola sira.
“Sentru seidauk bele responde ezijénsia eskola sira-nian tanba falta suratahan atu prodús kaderneta eskolár. To’o ohin loron seidauk hetan resposta husi aprovizionamentu Ministériu Edukasaun nian, tanba ne’e maka sentru labele aselera prosesu impresaun”, governante ne’e relata hafoin halo vizita urjente bá sentru ne’e hodi haree direita kondisaun serbisu no prosesu impresaun ba kaderneta eskolár.
Sekretáriu Estadu ne’e dehan sei halo esforsu atu sentru impresaun ne’e bele hetan lalais suratahan, liuhusi aselera prosesu aprovizionamentu nune’e bele responde ba pedidu sentru nian hodi halais produsaun kaderneta refere.
“Durante ne’e mosu falla iha kaderneta ne’e tanba prosesu aprovizionamentu Ministériu Edukasaun nian ba apoia suratahan ba sentru impresaun ne’e maka tarde to’o agora. Tanba ne’e, sentru ne’e halo de’it impresaun kaderneta balun hodi distribui ba eskola sira ne’ebé seidauk iha”, afirma.
Iha sorin seluk, Diretór Nasionál Sentru Impresaun Comoro, Hélder Aparício Guterres, haktuir katak prosesu produsaun kaderneta ba eskola sira la’o hela, maibé la tuir alvu. Kaderneta ba eskola bázika terseiru siklu nian maka to’o agora seidauk halo produsaun tanba sei falta suratahan, maibé ba primeiru no segundu siklu nian prodús ona.
“Ita prodús ona kaderneta eskolár ba estudante primeiru no segundu siklu nian hamutuk rihun 14, depois ba sekundáriu jerál nian rihun 90 maibé sentru foin bele responde rihun 75, sei hela metade maka seidauk prodús”, salienta.
Dirijente ne’e espare iha tempu besik ne’e maka Diresaun Aprovizionamentu bele responde ona suratahan, entaun bele garante ona prosesu produsaun kaderneta sira. “Agora, prosesu atu halo distribuisaun kaderneta bá eskola sira ne’e maka sentru sei halo empakotamentu no ida ne’e sei responsabiliza hosu parte kurríkulu nian”, realsa.
Lembra katak sentru impresaun submete proposta rua ba Aprovizionamentu, entre fulan-marsu no maiu, atu loke prosesu konkursu públiku hodi hatama ekipamentu sira ne’ebé sentru presiza.
Proposta ne’ebé submete ne’e bazeia ba orsamentu sentru nian ne’ebé prevee ho montante $885.474. Ba proposta dahuluk sentru husu atu sosa suratahan ho osan $501.450 no proposta seluk mak ba akizisaun materiál dijitál nian ho montante $383.813.
Notísia relevante: Sentru Impresaun Comoro falta suratahan atu prodús kaderneta eskolár
Jornalista: Tomé Amado
Editora: Maria Auxiliadora
