Aban, PN realiza semináriu nasionál “Garante protesaun labarik no joven iha Timor-Leste”
DILI, 27 setembru (TATOLI)—Parlamentu Nasionál (PN) liuhosi komisaun F trata asuntu Saúde, Seguransa, Sosiál no Igualidade Jéneru, kinta (28 setembru 2023) aban, sei realiza semináriu nasionál ho tema “Garante protesaun labarik no joven iha Timor-Leste” iha salaun Oka, Dili.
Notísia Relevante: INDDICA sensibiliza lei protesaun labarik ba membru F-FDTL
“Semináriu ho objetivu prinsipál realsa importánsia no urjénsia promosaun direitu ba labarik no joven iha perigu,” refere nota imprensa ne’ebé Agência Tatoli asesu, kuarta ne’e.
Semináriu ne’e ho subtema dahuluk mak Äsegura asisténsia urjénsia ba labarik no joven iha perigu” no subrtema seluk mak Äsegura justisa adekuadu ba labarik no joven iha perigu”.
Ba subtema dahuluk, sei aprezenta hosi oradór na’in-ha’at mai hosi Ministériu Solidariedade Sosiál no Inkluzaun (MSSI), Ministéiru Juventude Desportu Arte no Kultura, Institutu ba Defeza Direitu Labarik (INDDICA, siglá portugés) no Polísia VPU.
Subtema daruak ne’e sei aprezenta hosi oradór Ministéiru Públiku, Tribunál Rekursu, Provedória Direitu Umanu no Justisa (PDHJ, siglá portugés) ho Defensória Públika.
Semináriu ne’e sei partisipa hosi membru Parlamentu Nasionál (PN), reprezentante liña ministériu, organizasaun internasionál no nasionál sira.
Entretantu, atu dezenvolve sistema protesaun integral ba labarik no joven iha Timor-Leste, nesesáriu armoniza lei sira hotu relativa promosaun no protesaun direitu ba labarik no joven ne’ebé elabora lei no polítika públika.
Aprovasaun lejislasaun espesífika sentrada iha protesaun labarik no joven iha perígu no sensível ba nia nesesidade, kontribui estabelesimentu sistema protesaun integrál, aliña ho kompromisu internasionál.
Nune’e, iha 07 fevereiru 2023, PN aprova ona lei númeru 6/2023, 01 marsu, Lei Protesaun ba Labarik no Joven iha perígu, no promulga iha 21 fevereiru 2023.
Lei ne’e ho objetivu prinsipál dezenvolvimentu sistema protesaun integrál ba labarik no joven iha Timor-Leste, estabelese mekanizmu krusiál prevensaun no protesaun direitu, rekezitu kondisaun espesífika ba intervensaun mínima, proporsionalidade no audisaun obrigatória.
Lei ne’e estabelese mós dever komunikasaun okorénsia suspeita entidade kompetente, reforsa sistema protesaun integral ba labarik no joven iha perígu, no dezenvolve prosesu judisiál espesífiku, ne’ebé foka iha protesaun ba labarik no joven.
Nune’e, fundamentál implementasaun ba lei ne’e, prátika norma sira hodi kumpre objetivu sira ne’ebé iha.
Notísia Relevante: PN aprova projetu-lei protesaun ba labarik iha finál globál
Jornalista : Nelson de Sousa
Editór : Cancio Ximenes
