Sekretáriu AMC aprezenta ba administradór atu hala’o limpeza iha auto estrada
COVALIMA, 27 setembru 2023 (TATOLI)–Sekretáriu Administrasaun Munisípiu Covalima, Francisco de Jesus Alves, aprezenta ona ba Administradór munisípiu Covalima, Francisco de Andrade, rekomendasaun hosi deputadu komisaun E Parlamentu Nasionál atu hala’o limpeza jerál iha auto estrada ba administradór munisípiu Covalima.
Notísia Relevante: Komisaun E husu implementasaun PMOPA halo limpeza iha auto estrada
“Ha’u aprezenta ona ba ita-nia administradór munisípiu Covalima atu hala’o limpeza iha auto Estrada. Ami bele koordena hamutuk, tanba agora ita-nia ekipa sira mós hala’o servisu kada sesta ita hala’o limpeza,” Francisco de Jesus Alves hateten ba Agência Tatoli, iha nia kna’ar fatin, Sukaer Laran, kuarta ne’e.
Ho nune’e, nia hatutan, kada sesta feira funsionáriu sira sempre hala’o limpeza jerál iha estrada públiku, no kona-ba atu hala’o limpeza iha auto estrada seidauk hala’o tanba haree ba klima manas no ekipa sira mós hala’o servisu.
Maske sei hala’o, sekretáriu administrasaun ne’e promete semana oin sei mobiliza funsionáriu sira atu hala’o limpeza jerál iha auto estrada, relasiona rekomendasaun ne’ebé hato’o hosi deputadu komisaun E Parlamentu Nasionál.
Antes ne’e, iha kuarta (13/09) ne’e, deputadu komisaun E parlamentu nasionál hato’o rekomendasaun liuhosi implementasaun programa Mão de Obra Postu Administrativu atu hala’o limpeza jerál iha auto estrada tanba auto estrada foer tebes.
Razaun, reprezentante povu husu liuhosi implementasaun PMOPA hala’o limpeza iha auto estrada tanba ai-hun boot sira komesa taka ona auto estrada no estudante sira mós halai namkari iha estrada hanesan autoridade munisípiu la fó atensaun.
Jornalista : Celestina Teles
Editór : Cancio Ximenes
