COVALIMA, 13 setembru 2023 (TATOLI)–Komisaun E Parkamentu Nasionál (PN) husu autoridade covalima liuhosi implementa Programa Mão de Obra Postu Administrativu (PMOPA) atu hala’o limpeza jeral iha auto estrada, tanba haree ba autoridade estrada Covalima foer tebes.
“Ha’u husu ba Autoridade Covalima bainhira implementa Programa Mão de Obra Postu Administrativu atu hamoos auto estrada tanba ita haree auto estrada iha Covalima foer tebes,” Membru Komisaun E PN, Deputada Irene Gonzaga, hateten bainhira hala’o reuniaun ho autoridade Covalima iha salaun AMC, Sukaer Laran, kuarta ne’e.
Reprezenta povu ne’e hateten, presiza atu halo limpeza iha auto estrada iha Covalima, tanba ai-hun boot sira komesa taka ona estrada no estudante sira mós halai namkari iha estrada hanesan autoridade munisípiu la fó atensaun.
Implementasaun Programa Mão de Obra Postu Administrativu (PMOPA) presiza atu halo limpeza tanba auto estrada haree foer tebes, nune’e hatudu imajen ladun di’ak iha baianaka sira-nia matan.
Deputadu bandaka FRETILIN, Dário Madeira, hateten rekomendasaun hosi deputadu Irene Gonzaga atu hala’o limpeza iha auto estrada liuhosi implementa programa PMOPA ne’e pertinente maibé orsamentu laiha ona atu kontinua implementa Programa Mão de Obra Postu Administrativu (PMOPA)
“Ha’u-nia korajen servisu ne’ebé liga ba PMOPA lalika ona mehi, tanba orsamentu retifikativu la prevee orsamentu iha kontinuasaun atu implementa programa PMOPA,” nia hateten.
Sekretáriu Administradór Munisípiu Covalima, Francisco de Jesus Alves, hateten autoridade Covalima konsidera rekomendasaun hosi depuda atu hala’o limpeza iha auto estrada maibé hanesan sekretáriu sei relata ba administradór munisípiu Covalima.
“Auto estrada ita hakarak hateten kompeténsia hosi nasionál ami-nia kompeténsia ne’ebé prevee iha dekretu númeru 3/2016, ami haree ba estrada rurál ita simu rekomendasaun sira-ne’e auto estrada parte estadu nian ita bele kontribui,” nia dehan.
Nia dehan, iha kada sesta feira, Autoridade Covalima sempre organiza funsionáriu públiku sira iha Covalima atu hala’o limpeza jerál, nune’e bele halo limpeza jerál iha auto estrada.
Tanba ne’e, bainhira mak atu hala’o limpeza iha auto estrada maibé hanesan sekretáriu administradór sei relata ba Administradór Munisípiu Covalima, nune’e tempu badak bele hala’o limpeza iha auto estrada.
Jornalista : Celestina Teles
Editór : Cancio Ximenes
