iklan

DEFEZA, HEADLINE

Trix: “Bele sai forsa kualifikadu iha enjeñária”

Trix: “Bele sai forsa kualifikadu iha enjeñária”

Xefe Estadu Maior Jenerál F-FDTL partisipa iha enserramentu seremónia ezersísiu harii hamutuk ba dala-11 iha Unidade Apoia Servisu Metinaro, kuarta (27/09/2023). Imajen Tatoli/ Natalino Costa.

DILI, 27 setembru 2023 (TATOLI)-Ezersísiu Harii Hamutuk ba dala-11 iha Timor-Leste, ne’ebé inklui forsa armada husi nasaun haat hanesan Estadu Unidu Amérika (EUA), Nova Zelándia, Japaun no Austrália, hahú 28 agostu liubá, enserra ona, ohin.

Enserramentu ne’e hala’o direta husi Xefe Estadu Maior Jenerál Forsa Armadas Brigadeiru Jenerál, José da Costa ‘Trix’, akompañadu husi diplomata husi nasaun haat, ne’ebé nia militár sira hola parte mós iha ezersísiu ne’e

Xefe Estadu Maior Jenerál Forsa Armadas Brigadeiru Jenerál, José da Costa ‘Trix’, hateten, hanesan Xefe Estadu Maior, lori Falintil-Forsa Defeza Timor-Leste (F-FDTL) nia naran kongratula militár nasaun haat ne’ebé mak partisipa iha ezersísiu ne’e.

Notísia relevante: https://tatoli.tl/2023/08/28/falur-ezersisiu-harii-hamutuk-reforsa-kooperasaun-militar-rejional/

Ho ezersísiu ne’e nu’udar oportunidade di’ak tebes ba F-FDTL tanba bele aprende hamutuk hodi eleva sira-nia koñesimentu hamutuk kona-ba área siénsia militár nian liuliu iha parte enjeñária.

“Ho ezersísiu Harii Hamutuk tinan ne’e, bele eleva ita-boot sira-nia koñesimentu, bele sai forsa ne’ebé kualifikadu iha área enjeñária. Nune’e, karik aban bainrua bele fó asisténsia militár no asisténsia ba ita-nia komunidade sira bainhira iha situasaun dezastre ka bainhira komunidade sira presiza,” Trix hateten iha nia intervensaun durante serimónia enserramentu Ezersísiu Harii Hamutuk, iha UAS Metinaro, Dili, kuarta ne’e.

Aréa enjeñária sira ne’ebé aprende durante ezersísiu Harii Hamutuk ne’e mak hanesan treinamentu soldadura, oinsá atu sai mandór no water planification liliu fura bee moos ba komunidade sira.

Notísia relevante: https://tatoli.tl/2023/09/20/f-fdtl-ho-forsa-nasaun-lima-hatudu-ezersisiu-militar-kombate-enjinaria/

 Agradese apoiu

Trix agradese ba apoiu no kooperasaun militár ne’ebé Timor-Leste ho nasaun sira liuhosi ezersísiu sira durante ne’e F-FDTL halo ho militár sira hanesan Estadu Unidu Amérika, Nova Zelándia, Japaun, Austrália inklui nasaun sira seluk.

“Espera ho ezersísiu Harii Hamutuk ne’e ita kontinua hametin ita-nia kooperasaun ba oin atu kontinua ajuda F-FDTL hasa’e sira-nia koñesimentu militár iha futuru,” nia dehan.

Xefe Estadu Maiór Jenerál Forsa Armada ne’e mós kontente tanba liuhosi Ezersísiu Harii Hamutuk tinan ne’e iha baze Unidade Apoia Servisu (UAS) Metinaro, F-FDTL hamutuk ho forsa nasaun haat konsege halo halo kazerna rua iha UAS Metinaro, halo reabilitasaun ba eskola ida iha Odelgomo Bobonaro, inklui loke estrada iha baze UAS no tratamentu médika.

Iha fatin hanesan, Embaxadór Nova Zelándia, Philip Hewitt, hateten, Nova Zelándia kontente tebes haree ezersísiu Harii Hamutuk tinan ne’e, tanba militár sira hosi nasaun seluk inklui Militár Nova Zelándia bele aprende ho F-FDTL, nu’udar interkámbiu ida hodi partilla esperiénsia siénsia militár nian iha área Enjeñária nian.

Diplomata Novazelandés ne’e dehan, ba futuru Nova Zelándia sei hametin kooperasaun militár ho F-FDTL oinsá tulun militár Timor-Leste hodi apoia kapasitasaun rekursu umanu.

Nune’e mós, Emabaxadór Japaun ba Timor- Leste, Tetsuya Kimura, louva ezersísiu Harii Hamutuk ne’ebé maka nasaun lima halo durante fulan ida.

“Japaun Kompromete katak sei kontinua haforsa relasaun bilaterál ho Timor-Leste liuliu iha área militár liuhosi ezersísiu sira ne’e,” nia kompromete.

Enkuantu iha seremónia enserramentu ezersísiu Harii Hamutuk tinan ne’e, Xefe Estadu Maiór Jerál F-FDTL akompaña diplomata nasaun haat ne’ebé partisipa iha ezersísiu Hamutuk inaugura kazerna rua ne’ebé forsa sira hosi nasun lima F-FDTL, EUA, Nova Zelándia, Austrália inklui Japaun halo iha baze UAS, Metinaro.

Militár sira ne’ebé mak partisipa iha Ezersísiu Harii Hamutuk ba dala-11 tinan ne’e entrega kondekorasaun ida ba Xefe Estadu Maiór Jenerál Forsa Armadas, José da Costa ‘Trix’.

Entretantu, ezersísiu Harii Hamutuk tinan ne’e hola parte forsa na’in 218 kompostu hosi F-FDTL na’in 110, Forsa Austrália na’in-69, Nova Zelándia na’in-haat, Japaun na’in-16 no EUA na’in-19. 

Jornalista: Natalino Costa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!