SEV observa futuru jardín eroi Bobonaro
CAILACO, 29 setembru 2023 (TATOLI)-Sekretáriu Estadu Veteranu (SEV), Cesar dos Santos da Silva ‘Merak’, sesta ne’e hamutuk ho ekipa observa projetu ateru rai iha área Manu-Kaitete, baliza entre postu administrativu Maliana no Cailaco ne’ebé ba futuru atu estabelese jardín eroi munísipiu Bobonaro nian.
Merak haktuir, iha mandatu VIII Governu Konstituisionál, kompañia Mira-Mar Unipesoál Lda manán ona projetu ne’e ho montante $216,283.73 hodi ateru rai ne’e, maibe tanba falta koordenasaun téknika, obra ne’e la’ós implementa iha rai ne’ebé Konsellu Kombatente Munisipál Bobonaro identifika.
Notísia relevante: Governu-Veteranu Bobonaro deside harii jardín eroi iha Manapa
“Ita haree mosu tiha fallansu, prontu realidade hatudu tiha hanesan ne’e, ita mai buka hadi’ak, aban bainrua ita estabelese jardín eroi iha fatin Manu-Kaitete, ami mai koopera atu projetu ne’e bele la’o ho di’ak, depois haloot ita-nia eroi no mártir sira-nia ruin,” Merak informa ba jornalista sira, iha Manu-Kaitete.
Sekretáriu Estadu Veteranu ne’e halo observasaun ne’e atu haree besik liu projetu inisiál ne’ebé implementa ona, nune’e ba oin bele kria planu mestre kona-ba pozisaun atu harii portaun no fatin parajen karreta no motorizada.
Hafoin ida-ne’e sei relata ba Ministru Asuntu Kombatente Libertasaun Nasionál, Gil da Costa Monteiro ‘Oan Soru’, atubele vizita direita terrenu hodi foti desizaun.
“Kondisaun mak hanesan ne’e, ami seidauk bele hatete 2023 ka 2024, tanba konstrusaun ne’e foin faze inisiál, kuandu tama ona faze moru haleu, kampañia sira ami prepara ona, ne’e mak foin to’o iha faze besik halo funerál nian,” Governante ne’e afirma.
Enkuantu daudaun ne’e rai ne’ebé kompania ateru ho medida luan metru 160 no naruk metru 200 hosi totál rai ektare 86, ne’ebé komunidade postu administrativu Cailaco no Maliana oferese ba Konselu Kombatente Munisipál Bobonaro.
Fatin ne’e ba futuru sei haloot restu mortál hamutuk 580 ne’ebé daudaun ne’e prezerva hela iha Ossoario, suku Odomau, Maliana no 100-resin iha suku Mali-lait, postu administrativu Bobonaro.
Notísia relevante: Veteranu Bobonaro husu Governu labele demora haloot restu mortál sira iha osoáriu
Jornalista: Sérgio da Cruz
Editór: Evaristo Soares Martins
