DILI, 30 setembru 2023 (TATOLI) – Ohin, Boxista lendáriu Manny Pacquiao “Pac man” fila ona ba Filipina, hafoin loron rua, iha Timor-Leste (TL) tanba konvida husi Governu liuhusi Ministériu Juventude, Desportu, Arte no Kultura (MJDAK).
Oinsá impresaun boxista timoroan sira nian ba prezensa Manny Pacquiao, tuirmai TATOLI, sei hato’o sira-nia hanoin, iha ámbitu vizita boxista lendáriu Filipino, liuhusi entrevista ho Tatoli iha Benfica Dili, sesta kalan:
Martinho da Costa, Boxista Klube Fomento Boxe
“Nuudar atleta Boxe, ami sente orgullu tebes ho vizita Boxista Manny Pacquiao. Nu’udar atleta hakarak los nia mai maibé ohin loron nia sama-ain duni iha ita-nia nasaun, ami kontente tebes”.
“Uluk sei kiik ha’u nonton (asiste) boxe sempre haree Paquiao nia jogu, entaun halo ha’u gosta los nia, Boxista hosi nasaun barak mak nia hatun ida ne’e mak inspira ha’u harak tama Boxe. Ha’u foti esperiénsia barak hosi nia liu de’it hosi telivizaun, hanesan tékniku, no tuku sira ne’e”.
Domingas Araújo Barros, Boxista Klube Benfica
“Ha’u sente kontente los tanba durante ne’e haree de’it nia hosi telivizaun maibé agora haree nia direita, nia mai vizita mós ami-nia fatin Benfica. Ha’u sente kontente tebes”.
“Buat ne’ebé motiva ha’u hosi Pacquiao mak nia ema ida nunka hatene kolen, treinu makaas, disiplina di’ak no la ko’alia barak; ida ne’e mak buat ne’ebé nia iha hodi motiva ha’u”.
Boxista Zevanio Maia, Boxista Klube Benfica
“Nia mai ne’e hanesan meiu ida atu motiva atleta Timoroan sira bele asesu ba hala’o treinamentu iha internasionál, tanba ita haree iha Ázia ne’e ema hosi Filipina asesu barak ba hala’o treinamentu Boxe iha nível internasionál liuliu Amerika. Fiar katak ho prezensa Pacquiao nian ne’e bele ajuda Boxista Timoroan balun ba hala’o treinamentu iha internasionál: Filipina no nasaun seluktan”
Filomena Soares de Jesus, Boxista Klube Dili Boxe
“Ha’u sente kontente tebes, nasaun barak konvida nia la naran ba maibé ita Timor nia mai. Hanesan Boxista ida sente hanesan onra-boot mai ami. Fiar katak nia mai ne’e bele fó motiva liutan ami atu hala’o treinamentu ne’ebé masimu liutan, atu nune’e Boxista Timoroan bele halo morin Timor-Leste nia naran”.
Notisia relevante:Manny Pacquiao husik Timor-Leste ho novidade di’ak
Jornalista: Hortêncio Sanchez
Editór: Rafael Ximenes de A. Belo
