COVALIMA, 02 Outubru 2023 (TATOLI)—Ajénsia Dezenvolvimentu Nasionál, Institutu Públiku (ADN, I.P) foti ona sampel atu halo estudu estrutura rai hodi halo konstrusaun postu saúde Rai Hun lokaliza iha suku Beiseuk, postu adminitrativu Tilomar nia aliserse nakfera tanba impaktu hosi dezastre naturál.
Notísia Relevante: Governu sei observa direta konstrusaun postu saúde Beiseuk aliserse nakfera
Diretora Servisu Saúde Munisípiu Covalima, Maria Fátima Moniz, hateten Ajénsia Dezenvolvimentu Nasionál, Institutu Públiku (ADN, I.P) foti sampel hodi halo estudu, relasiona ho Ministériu Saúde hato’o informasaun hafoin halo kedas monitorizasaun.
“Ajénsia Dezenvolvimentu Nasionál, Institutu Públiku (ADN, I.P) foti ona sampel konstrusaun sentru saúde Beiseuk hodi halo teste ba rai, nune’e ita seidauk hetan nia rezultadu,” Diretora Servisu Saúde Munisípiu Covalima, Maria Fátima Moniz, hateten ba Agência Tatoli, iha nia servisu fatin, camnasa, segunda-ne’e.
Razaun ADN hala’o monitorizasaun ne’e hodi foti sampel ba iha rai refere, atu haree no halo teste kle’an liután, nune’e rai ne’e kontinua bele uza ka lae no sentru saúde aat ne’e impaktu hosi dezastre natural ka buat seluk dia.
Ho nune’e, diretora ne’e dehan, foin lalais iha fulan-setembru ne’e ekipa ADN mai hodi foti sampel atu halo estudu kona-ba estrutura rai, nune’e hein de’it nia rezultadu atu sai oinsá.
Aleinde ADN foti ona sampel, Ministériu Saúde mós hala’o vizita ba konstrusaun sentru saúde Rai Hun ne’ebé lokaliza iha suku Beiseuk, haree labele atu uza tanba konstrusaun uma iha parte klaran hetan estragu boot.
“Ita nafatin informa ba iha sentrál, tanba konstrusaun nia dezeñu no Planta no Kadernu em Kargu (BoQ=Bill of Quantity) mai hosi Ministériu Saúde (MS) sentrál,” nia hateten.
Antes ne’e, iha 14 juñu 2023, komunidade hato’o preokupasaun kona-ba konstrusaun postu saúde Rai Hun ne’ebé kompañia Carame Unipesoál, Lda, hahú halo konstrusaun iha 18 agostu 2021 ne’ebé finaliza iha 17 fevereiru 2022, maibé seidauk hala’o inaugurasaun tanba konstrusaun refere ninia aliserse nakfera.
Bazeia ba kontratu kompañia Carame Unipesoál, Lda, hala’o konstrusaun postu saúde ho durasaun tempu fulan neen ne’ebé ho totál orsamentu hamutuk $295,785.42.
Jornalista : Celestina Teles
Editór : Cancio Ximenes
