Governu sei observa direta konstrusaun postu saúde Beiseuk aliserse nakfera
COVALIMA, 26 jullu 2023 (TATOLI)–Governu liuhosi Ministériu Saúde sei hala’o observasaun direta konstrusaun postu Saúde Raihun ne’ebé lokaliza iha suku Beiseuk, postu administrativu Tilomar, munisípiu Covalima ne’ebé nia aliserse nakfera tanba impaktu hosi dezastre naturál.
Notísia Relevante: Aliserse konstrusaun postu saúde Tilomar nakfera tanba dezastre naturál
“Tempu badak, ita-nia Vise Ministru Saúde sei vizita no observa direta ba iha ita-nia postu saúde Raihun nia aliserse nakfera, tanba servisu saúde Covalima submete ona relatóriu eskrita no mós hato’o ona problema ne’e liuhusi enkontru konsellu Ministériu saúde,” Diretora Servisu Saúde Munisípiu Covalima, Maria de Fátima Moniz, hateten ba Agência Tatoli, iha nia kna’ar fatin Camnasa, kuarta ne’e.
Tuir loloos, nia dehan, Vise Ministru Saúde atu hala’o vitiza tanba foin lalais selebra loron nasionál saúde iha munisípiu Lautém, entaun la konsege nune’e adia fali ajenda.
Hafoin impaktu hosi dezastre naturál konstrusaun postu saúde Raihun, suku Beiseuk, postu administrativu Tilomar nia aliserse nakfera diretora mós submete kedas relatóriu ba Ministériu Saúde no autoridade Covalima
“Prosesu ita hato’o ona relatóriu ba iha Ministériu Saúde no Autoridade Covalima no parte Ministériu Saúde (MS) hala’o ona observasaun submete ona ba AND oinsá atu haree kona-ba estrutura rai, postu saúde Raihun ne’ebé aliserse nakfeta tanba impaktu hosi dezastre natural,” nia dehan.
Maske submete mós relatóriu ba Autoridade Covalima maibé tanba orsamentu apoiu hosi MS hosi munisípiu hein de’it katak parte nasionál mai haree, oinsá bele hadi’a hikas konstrusaun refere nune’e bele halo atendimentu ba komunidade sira iha suku Beiseuk.
Antes ne’e, komunidade preokupa ho konstrusaun postu saúde Raihun ne’ebé konstrui hosi kompañia Carame Unipesoál, Lda, hahú iha 18 agustu 2021 seidauk finaliza konstrusaun aliserse hahú nakfera.
Postu Saúde Raihun ne’e konstrui hosi kompañia Carame Unipesoál, Lda, ne’ebé hahú konstrui iha 18-8-2021 sei finaliza 17 fevreiru 2022, maibé to’o ohin loron seidauk hala’o inaugurasaun.
Bazeia ba kontratu kompañia Carame Unipesoál, Lda, hala’o konstrusaun postu Saúde ho durasaun tempu fulan neen ne’ebé ho totál orsamentu $295,785.42.
Notísia Relevante: Konstrusaun postu saúde Tilomar seidauk inaugura maibé nia aliserse hahú nakfera
Jornalista : Celestina Teles
Editór : Cancio Ximenes
