MALIANA, 06 outubru 2023 (TATOLI)-Sekretáriu Estadu Dezenvolvimentu Lokál (SEDL), Mateus dos Santos Tallo, husu ba ekipa Programa Dezenvolvimentu Integradu Munisipál (PDIM) munisípiu Bobonaro atu kontrola implementasaun Programa Mão de Obra Postu Administrativu (PMOPA) tinan 2023 hodi asegura labele akontese nepotizmu.
Nia hato’o asuntu ne’e durante halo enkontru ho autoridade postu no autoridade lokál sira iha munisípiu Bobonaro, sesta ne’e.
Notísia relevante: Bobonaro hetan alokasaun rihun $600 implementa PMOPA
“Ha’u husu asegura PMOPA, ita-nia PDIM, favór ida fó asisténsia ba implmentasaun programa ne’e, tanba iha Lolotoe horisehik sira foin hahú, imi tenke halo kalendáriu monitorizasaun, segunda agora tenke iha terrenu,” nia hateten edifísiu administrasun munisipál Bobonaro.
Nia parte simu keixa katak iha implementadór balun durante fó de’it oportunidade servisu ba nia família no hili mali tuir kór.
“Nia osan ki’ik, maibé tenke servisu hotu, 20 dias nia laran, 10 dias ba grupu ida 10 dias grupu seluk, tenke asegura ida ne’e, labele ema ida deit servisu 20 dias, ema seluk la hetan benifísiu, sira tenke sinte hotu, labele haree família no labele haree kór de’it, komunidade hotu-hotu iha direitu,” nia apela.
Administradór postu administrativu Lolotoe, Casemiro Fereirra Bernardo, justifika durante ne’e implementasaun PMOPA iha Lolotoe la’o tuir matadalan ne’ebé estabelese, maibé atraza tanba kestaun klima.
“Ami-nia ne’e foin dadus udan-boot iha fulan jullu, estrada kondisaun aat totál, nune’e moos ate a data seidauk iha normalizasaun estrada tama ba postu, tanba ne’e mak atraza, maibé faze daruak nian horisehik ami komesa lansa ona, ohin grupu balu komesa servisu ona,” nia informa.
Tuir dadus tinan 2023 MAE aloka orsamentu rihun $600 ba autoridade munisípiu hodi implementa PMOPA, no hosi montante orsamentu alokadu fahe ba postu administrativu neen kada postu hetan rihun $100 ho nia totál atividade 204 ne’ebé emprega ema na’in 3,980
Notísia Relevante:PAM Bobonaro husu traballadór PMOPA serbisu ho loloos
Jornalista: Sérgio da Cruz
Editór: Evaristo Soares Martins
