COVALIMA, 07 outubru 2023 (TATOLI)—Komandante Jerál (Komjer) PNTL, Henrique da Costa, hakarak aumenta rekursu no ekipamentu ba membru sira, nune’e bele halo serbisu ho di’ak.
“Kona-ba ita-boot sira-nia ekipamentu, uniforme no transporte, loloos ita hasai orden rotasaun transferénsia ba Komandante, ita la hasai orden transferénsia karreta, ho nune’e bainhira Komandante la’o, karreta mós transfere tuir hotu,” Komjer PNTL hato’o iha Komandu Covalima, sesta (06/10) ne’e.
Notísia relevante : MI kompromete atentu ba infraestrutura no ekipamentu PNTL
Nia fó ezemplu, hanesan Padre Kapelaun anteriór bainhira sai troka ona, maibé seidauk entrega karreta ba fali Padre Kapelaun foun.
“Ita fó ona orientasaun ba parte transporte atu dada karreta hodi entrega ba Padre Kapelaun foun, ida-ne’e ezemplu kiik, hakarak hato’o ba ita-boot sira katak problema transporte la’ós akontese iha Covalima de’it, maibé iha mós munisípiu sira seluk,” nia informa.
Kona-ba problema hirak ne’e, nia parte simu ona informasaun hosi Komandante munisípiu Covalima, nune’e ba futuru sei jere di’ak liután.
Komandante munisípiu Covalima, Superintendente Polísia Calisto Gonzaga, hateten, daudaun ne’e nia rasik laiha transporte, nune’e bainhira atu hala’o viajen serbisu ba nasionál uza karreta hosi Eskuadra.
Tuir dadus, membru PNTL iha munisípiu Covalima hamutuk 148 koloka ba Eskuadra hitu. Hosi Eskuadra hitu ne’e, iha Suai mak laiha transporte, enkuantu seluk iha ona.
Jornalista : Celestina Teles
Editora : Julia Chatarina