Top

Komisaun espesializada halo audiénsia públika ba alterasaun lei Divizaun Administrativa

Deputadu Partidu Congresso Nacional de Reconstrução Timorense (CNRT), Patrocínio dos Reis Fernandes. Imajen/Mídia SEKOMS.

DILI, 10 outubru 2023 (TATOLI)—Komisaun espesializada iha Parlamentu Nasionál (PN), tersa ne’e, hahú hala’o audiénsia públika hodi rona Governu ba proposta-lei númeru 3/VI (1a) kona-ba alterasaun dahaat lei númeru 11/2009, 07 outubru, aprova Divizaun Administrativu Territóriu.

Notísia Relevante: Governu muda Atauru sai divizaun administrativa ho tratamentu espesiál

“Tuir kalendáriu ohin, ita hahú fali audiénsia ba proposta-lei númeru 3/VI (1a) kona-ba alterasaun dahaat lei númeru 11/2009, 07 outubru, aprova Divizaun Administrativu Territóriu. Proposta-lei ne’e meza PN baixa ba komisaun A (trata asuntu Justisa no Konstituisionál) iha 29 setembru, ne’e mak komisaun halo andamentu tau kalendáriu no ohin ita halo audiénsia ba lei ida-ne’e,” Prezidente Komisaun A, Deputadu Patrocínio Fernandes, hateten iha ámbitu audiénsia iha sala plenária PN.

Audiénsia ne’e hola parte mós komisaun espesializada sira hanesan komisaun B trata asuntu Negósiu Estranjeiru no Defeza ho Seguransa, komisaun C trata Finansa Públika, komisaun D trata Ekonomia no Dezenvolvimentu.

Iha intervensaun inisiál, Ministru Administrasaun Estatál (MAE), Tomás do Rosário Cabral, hato’o informasaun jerál Governu lori fali alterasaun dahaat lei númeru 11/2009, 07 outubru, ba Divizaun Administrativu Territóriu no iha alterasaun ne’e la barak iha artigu rua ka tolu de’it.

“Ida mak ko’alia kona-ba Ataúro, tanba Ataúro iha alterasaun ba kotuk tama hela iha postu administrativu Dili. Ne’ebé, ho alterasaun ne’e mai Ataúro iha artigu haat (4), nia tama ona iha sirkunstánsia administrasaun ne’ebé iha,” nia hateten.

Iha alterasaun ne’e, Governante ne’e hateten, hadi’a mós postu administrativu balun iha munisípiu Ermera, Hatulia A no B no mós iha munisípiu Lautém atu akresenta iha lei Divizaun Administrativa Territóriu atu bele asegura sira-nia funsionamentu iha nível munisipál sira.

“No, Atauro iha artigu haat (4) ohin ne’e, abranje illa Ataúro ne’e ou mantein nafatin kapitál ka sidade ne’e iha antiga vila Maumeta. Tanba ne’e, ami atu reajusta fila-fali Ataúro ne’ebé iha estatutu agora iha hela. Depois aprovasaun lei ne’e bele avansa ba dekretu Governu no iha mós fundu espesiál ba Ataúro iha Governu anteriór funsiona hela iha aktu sira-ne’ebé liu ba,” nia dehan.

Tanba ne’e, nia dehan, Governu hodi fali mai iha Parlamentu Nasionál husu aprovasaun liuliu munisípiu Ermera iha Hatulia A no B no munisípiu Lautém iha Lore, Luro ho Tutuala no iha munisípiu Dili mak hasai tiha Ataúro hosi sirkunstánsia administrasaun Ataúro ba Dili nian ne’e, nia iha lei anteriór seidauk revogadu Ataúro sei hola parte hela iha postu administrativu Dili.

Deputadu FRETILIN, Antoninho Bianco, hateten laiha mudansa signifikativu tanba se hakarak di’ak-liu hanoin eskalaun divizaun administrativu ne’e iha prátika realidade ne’ebé iha ne’e, munisípiu ne’e tuir loloos muda mós rejiaun ne’e mak eskalaun dahuluk hafoin postu administrativu eskalaun daruak no tuir mak suku no aldeia.

Nia dehan, divizaun administrativu territóriu ne’e eskalaun karik ha’u hanoin hosi aldeia, suku, postu administrativu, munisípiu labele muda hanesan rejiaun hanesan RAEOA ne’e, se hadi’a buat balun hodi haree buat ne’e

“Tuir mai mós se ita tau difinasaun konseitu ne’e primeiru eskalaun ne’e mak munisípiu no rejiaun no Ataúro ne’e mós primeiru eskalaun. Maibé, Ataúro ne’e ema dehan naran orijinál  territóriu la’ós eskalaun administrativu,” nia hateten.

Enkuantu hafoin audiénsia públika komisaun espesializada sei halo relatóriu paresér inisiál, no relatóriu paresér setoriál hafoin sei kontinua diskusaun faze jeneralidade no espesialidade espesífiku ba alterasaun artigu sira.

Notísia Relevante: Meza PN baixa alterasaun lei Divizaun Administrativa Territóriu ba komisaun A

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!