DILI, 12 outubru 2023(TATOLI)–Diretora Ezekutiva Organizasaun Naun Governamentál Forum Komunikasaun Feto Timor Lorosa’e (FOKUPERS), Maria Fátima Pereira Guterres, relata tuir relatóriu hahú hosi fulan-janeiru to’o agostu 2023 ema rihun tolu maka tuir ona edukasaun seksuál reprodutiva liu-liu kona-ba siklu produtividade feto ho mane.
“Ami kolabora ho lideransa komunitária sira iha nível suku hodi sensibiliza asuntu violénsia bazea ba jéneru atu prevene violénsia no abuzu seksuál. Ami komesa servisu hamutuk ho manorin, estudante no Associação dos país atu foka liu ba asuntu siklu feto ho mane kona-ba edukasaun seksuál kompriensivu,” Nia hateten ba Tatoli, iha Faról, ohin.
Notísia relevante :FOKUPERS rejista vítima violénsia bazeia ba jéneru-fiziku kuaze na’in-800
Diretora ne’e esplika, kona-ba edukasaun seksuál ba joven no ema hotu ho ninia kontiúdu maka jere emosaun, koñese ema nia-aan, kria komunikasaun saudável no prevensaun moras hada’et ba ema no seluktan.
Organizasaun ne’e uza teatru hodi sensibiliza informasaun ba ema atu eduka ema no haree diretamente kona-ba asaun violasaun diretu umanu no oinsá enkamiña ba autoridade kompettente bainhira mosu violasaun sira. Tanba sensibilizasaun kona-ba edukasaun seksuál ajuda ema atu evita depresaun iha sosiadade no prevensaun ba violénsia doméstika.
Kona-ba kauza hosi problema sosiál ne’ebé barak akontese iha Timor-Leste, Diretora FOKUPERS ne’e hateten fatór ekonomia, edukasaun la adekuadu no mós sistema patriakál iha família hodi kontribui ba problema sosiál.
“Ita tenke komesa hadi’a edukasaun, tanba edukasaun di’ak bele muda mentalidade atu ema ida-idak muda atitude,” Nia hateten.
Responsável Organizasaun FOKUPERS ne’e enkoraja ba feto hotu-hotu iha Timor-Leste atu hato’o keixa ba autoridade kompetente sira bainhira hetan violasaun oin-oin kontra direitu feto nian.
Notísia relevante :Edukasaun saúde reprodutiva no foinsa’e iha vida reprodusaun (II)
Jornalista: Jesuína Xavier
Editor : Agapito dos Santos
