FOKUPERS rejista vítima violénsia bazeia ba jéneru-fiziku kuaze na’in-800
DILI, 17 jullu 2023 (TATOLI)—Diretora Ezekutiva Forum Komunikasaun Feto Timor-Lorosa’e (FOKUPES), Maria Fátima Perreira Guterres, hateten durante tinan tolu (2020-2022) nia laran ne’e FOKUPERS rejista kazu vítima violénsia bazeia ba jéneru no violénsia fíziku kuaze 800.
Notísia Relevante: SEII kompromitidu aselera igualdade jéneru alkansa dezenvolvimentu inkluzivu
“Durante tinan tolu hosi 2020 to’o 2022, ita iha vítima violénsia bazeia ba jéneru no violénsia fíziku kuaze na’in-800 ne’ebé hetan asisténsia hosi FOKUPERS rasik,” Maria Fátima Perreira Guterres hateten ba jornalista sira, hafoin selebra aniversáriu FOKUPERS nian ba dala-26 iha salaun João Paulo II Comoro, segunda ne’e.
Nia dehan, hosi tipu violénsia bazeia ba jéneru, violénisa fíziku ne’ebé komete hosi laen rasik, violénsia seksuál, insestu no abandonadu ne’e rejista kazu violénsia fíziku mak boot-liu.
“Hosi kazu ne’e, ha’u bele dehan kazu violénsia fíziku mak boot liu, depois tuir mai mak kazu abandona no mós kazu insestu no violénsia seksuál,” nia dehan.
Hosi númeru kazu ne’ebé mak boot, nia dehan, FOKUPERS nia parte kontinua halo advokásia maibé presiza nafatin apoiu hosi Estadu ida-ne’e.
“Iha programa haat ne’ebé mak durante ne’e hala’o mak konsensiblizasaun no advokásia, promove edukasaun igualdade jéneru, no hahú kuda mós prinsípiu direitu nian, seluk mak fó asisténsia vítima iha uma mahon haat iha Timor-Leste,” nia dehan.
Tanba ne’e, nia dehan, FOKUPERS hamriik metin nafatin hodi kontinua luta ba feto no labarik feto sira-ne’ebé hetan violénsia bazeia ba jéneru.
“Kontente la’o hamutuk ho vitima no sobrevivente sira iha ita-nia misaun, hodi forma sira sai ajente transformadór ne’ebé forte ba mudansa iha sosiedade,” niahateten.
Sekretária Estadu Igualdade no Inkluzuan (SEII), Elvina de Sousa Carvalho, hateten papél importante ida hosi FOKUPERS mak lidera ona advokásia hodi Timor-Leste adopta ona Lei Kontra Violénsia Domestika iha tinan 2010 no mós fornese apoiu esensiál ba vítima no sobrevivente violénsia bazeia ba jéneru inklu violénsia domestika.
“Ida-ne’e elementu importante tebes iha nasaun ida-nia progresu atu asegura nia sidadaun feto sira livre hosi forma violénsia saida de’it. Iha esperiénsia nasaun hotu-hotu, violénsia doméstika ne’e sai hanesan todan ba dezenvolvimentu ema-nian no ba nasaun tanba kustu ne’ebé bootliu no la’ós fó de’it impaktu ba vítima no jerasaun agora maibé ba família no komunidade tomak nia futuru,” nia dehan.
Nia dehan, Timor-Leste nia Konstituisaun mós garante ona kona-ba respeitu ba direitu umanu ema ida-idak nian no mós integridade família nian hanesan unidade sosiál no kulturál ne’ebé mak fundamentál ba Timor-Leste nia dezenvolvimentu.
Jornalista : Osória Marques
Editór : Cancio Ximenes
