iklan

DILI, INKLUZAUN SOSIÁL

SEII kompromitidu aselera igualdade jéneru alkansa dezenvolvimentu inkluzivu

SEII kompromitidu aselera igualdade jéneru alkansa dezenvolvimentu inkluzivu

Sekertaria Estadu Igualidade, Elvina de Sousa Carvalho. Imajen Tatoli/Francisco Sony.

DILI, 17 jullu 2023 (TATOLI)—Sekretária Estadu Igualdade Inkluzaun (SEII), Elvina de Sousa Carvalho, hateten IX Governu Konstitusionál kompromitidu kontinua esforsu aselera igualdade jéneru hodi alkansa dezenvolvimentu inkluzivu.

“IX Governu Konstitusional kompromitidu atu kontinua halo esforsu makaas liután hodi aselera igualdade jéneru no alkansa dezenvolvimentu ne’ebé inkluzivu no equitável liuhosi asegura implementasaun kompromisu internasionál hanesan, Konvensaun Direitu Ema ho Defisiénsia, Ajenda 2030 Meta Dezenvolvimentu Sustentável “la husik ema ida iha kotuk” no rekomendasaun sira hosi Komitê CEDAW tinan 2023 nian,” Elvina de Sousa Carvalho hateten iha aniversáriu FOKUPERS ba dala-26 liuhosi semináriu ho tema “Hamutuk ho FOKUPERS Ita Kontribui ba Estadu nia Kompremísiu ba Jéneru”, iha Salaun João Paulo II, Comoro segunda ne’e.

Tanba, nia dehan, IX Governu Konstitusional iha misaun boot liuhosi ninia programa sira-ne’ebé mak trasa ona no sei aprezenta iha Parlamentu Nasionál iha semana ida-ne’e.

Forum Komunikasaun Feto Timor-Lorosa’e (FOKUPES) hasai retratu hamutuk parseiru sira iha semináriu ho tema “Hamutuk ho FOKUPERS Ita Kontribui ba Estadu nia Kompremísiu ba Jéneru, iha Salaun João Paulo II, Comoro Dili, segunda (17/07). Imajen Tatoli/Francisco Sony.

“Ha’u mós hakarak reitera ha’u-nia kompromisiu atu kontinua haforsa ita-nia kolaborasaun sira atu bele hamutuk halo advokásia ba liña ministeriál sira no insitutuisaun relevante sira atu halo polítika, lei, programa, planu no orsamentu ne’ebé adekuadu hodi implementa rekomendasaun sira hosi Komitê CEDAW,” nia dehan.

Sekretaria Estadu ba Igualdade iha ona planu atu halo aprezentasaun ba Konsellu Ministru, Parlamentu Nasional, GMPTL, liña ministeriál sira atu kumpreende kona-ba oinsá implementa rekomendasaun hirak ne’e tuir sira-nia área.

Tanba, papél importante ida hosi FOKUPERS mak lidera ona advokásia hodi Timor-Leste adopta ona Lei Kontra Violénsia Domestika iha tinan 2010 no mós fornese apoiu esensiál ba vítima no sobrevivente violénsia bazeia jéneru inklu violénsia domestika.

Ida-ne’e elementu importante tebes iha nasaun ida-nia progresu atu asegura nia sidadaun feto sira livre hosi forma violénsia saida de’it, tanba iha esperiénsia nasaun hotu-hotu violénsia doméstika ne’e sai hanesan todan ba dezenvolvimentu ema-nian no ba nasaun tanba kustu ne’ebé boot liu no la’ós fó de’it impaktu ba vítima no jerasaun agora maibé ba família no komunidade tomak nia futuru.

Nia dehan, Timor-Leste nia Konstituisaun mós garante ona kona-ba respeitu ba direitu umanu ema ida-idak nian no mós integridade família nian hanesan unidade sosiál no kulturál ne’ebé mak fundamentál ba Timor-Leste nia dezenvolvimentu.

“Ha’u la partisipa iha aprezentasaun Relatóriu Periódiku CEDAW ba dahaat iha Genebra iha loron 9 fulan-Maiu foin lalais ne’e, maibé ekipa ne’ebé mak halo aprezentasaun lidera rasik hosi Sekretária Estadu sesante Merita Correia, Xefe Herminio no Xefi Gabinete hosi SEII. Iha mós membru delegasaun sira mak hanesan hosi Tribunál Rekursu Mertitisíma Doutora Maria Natércia Gusmão Pereira, Juiza Konielleira, CNC, MSSI, MEJD, MKAE no MAE,” nia hateten.

Hafoin Lei Kontra Violénsia Domestika aprova, Governu Timor-Leste mós dezenvolve ona Planu Asaun Nasionál Kontra Violénsia Bazeia Jéneru hanesan medida atu operasionáliza Lei Kontra Violénsia Doméstika ba dala rua, PAN primeiru hosi tinan 2012 to’o tinan 2017 no PAN daruak hosi tinan 2017 to’o tinan 2021.

Komitê CEDAW espresa sira-nia apresiasaun ba progresu ne’ebé atinje ona dezde relatóriu estadu iha tinan 20215 (CEDAW/C/TLS/2-3) hodi halo ona reforma ba lejislasaun balun liuliu iha área sira hanesan Lei Bolsa da Mãe–Bolsa da Mãe Jerasaun Foun ne’ebé estende apoiu ba inan isin-rua no oan sira tinan 2021; Lei Tráfiku Umanu tinan 2017; Lei Espropriasaun atu fornese protesaun ba feto iha kazu rai nian tinan 2017; no lei kona-ba establesimentu Rejime Kontributóriu Seguransa Sosiál.

Timor-Leste mós adopta ona PAN-Violénsia Bazeia Jéneru, Deklarasaun Maubisse no PAN-1325 kona-ba feto no seguransa hodi promove igualdade jéneru no diskriminasaun hasoru feto. Maibé sei iha rekomendasaun lubuk ne’ebé presiza Governu, sosiedade sívil, organizasaun feto no entidade hotu-hotu atu servisu hamutuk makaas liu tán hodi realiza ita nia vizaun atu kria sosiedade ida-ne’ebé justu ba ema hotu-hotu no livre hosi violénsia iha Timor-Leste.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!