DILI, 12 outubro 2023 (TATOLI)–Konfederasaun Sindikatu Timor-Leste (KSTL), komesa tinan 2022 to’o oras ne’e, oferese ona kursu ba foinsa’e sira iha aréa inglés, lian koreia, administrasaun finansa no informátika.
“Husi etapa primeiru no segundu hamutuk ne’ebe iha ami fó ona graduasaun ba ema 93 iha aréa língua inglês, lian koreia, administrasaun no finansa. Formasaun ne’e bazea ba demanda merkadu,” Prezidente KSTL, Almerio Vila Nova, hateten ba Tatoli, iha Bemori Dili.
Notísia Relevante :KSTL husu Governu hasa’e saláriu mínimu ba $250
Nia dehan hosi formandu 93 ne’e, formandu na’in 10 maka konsege bá servisu ona iha Aústralia no Koreia do Súl liuhosi programa Sekretariu Estadu Formasaun Profisionál no Empregu (SEFOPE).
Tuir planu iha tempu badak, KSTL sei fó tan graduasaun ba formandu hamutuk ema-30 hafoin partisipa formasaun durante fulan-tolu no estájiu iha instituisaun públiku no privada sira iha Timor-Leste.
“Formasaun ba língua inglês, lian koreia, administrasaun finansa no infomátika kontinua disponível ba joven sira ne’ebe hakarak tuir,”nia hateten.
Atu kapasita joven sira iha aréa oioin maka KSTL iha ona planu sei loke tan kursu iha aréa konstrusaun no Baby Sister ba Timoroan tuir demanda merkanu nian.
Notísia Relevante :KSTL rejista kazu disputa laborál hamutuk 22 iha agostu
Jornalista: Jesuína Xavier
Editor: Agapito dos Santos
