DILI,12 outubru 2023 (TATOLI)- Padre Ângelo Salsinha, hateten vizita Amu Papa, João Paulo II mai Timor-Leste, iha loron 12 fulan-outubru 1989 lori esperansa ba Timoroan hotu atu luta ba prosesu ukun rasik aan.
Tuir istória loron 12 fulan-outubru 2023, Timor-Leste komemora loron Amu Papa João Paulo II vizita mai Timor-Leste ba dala-34(12 outubru 1989-12 outubru 2023).
Notísia relevante :Papa João Paulo II: “Imi masin rai nian… imi naroman mundu nian”
“Timor-Leste komemora loron vizita Santu Padre João Paulo II ne’e úniku santu hotu-hotu iha kalendáriu liturjíku ida ne’ebe sama rasik ain iha ita-nian rai. Ho nia prezensa iha situasaun iha momentu ne’ebá ne’e situasaun defísil ita-nia rai. Ita haree laiha ona esperansa, sofrimentu ne’ebe mundu haluha ona, maibé prezensa lori esperansa ba Timoroan hotu-hotu,” Pe. Ângelo Salsinha, konfesa ba Tatoli, iha Balide Dili.
Amu Papa ninia mensajen fó esperansa no korajén ba Timoroan hotu katak Maromak sei lahaluha Timoroan ninia terus liga ho prosesu luta ukun rasik aan.
“Timoroan sira iha situasaun sira defísil nia laran, imi mak tenke sai masin rai nian no naroman ba mundu nian, se la’ós imi Timoroan sira, entaun se? Se la’ós agora bainhira tan mak imi sai masin no naroman,”Pe. Ângelo Salsinha, re-lembra hikas mensajén Santu Padre João Paulo II nian.
Tuir padre Ângelo Salsinha nia analize no observasaun, hosi asaun Amu Papa João Paulo II re’in rai Timor ne’e tanba Santu Padre rekoiñese Timor-Leste hanesan nasaun soberanu ida iha mundu, baibain diplomatikamente akontese Amu Papa re’in rai ida bainhira hala’o vizita bá nasaun ida.
“Iha momentu ne’ebá diplomatikamente ema (invazór sira lakon esperansa). Papa re’in Rai Timor sai rekoñesementu profundu ba ita hetan esperansa ba libertasaun,” nia rekorda.
Vizita Amu Papa nian hamosu esforsu koletiva hosi ema hotu nia kontribuisaun atu Timoroan hotu hetan hakmatek, unidade, prospriedade, fraternidade no mós solidariedade.
Padre Ângelo Salsinha relembra katak iha altura ne’ebá maske sei ho idade ki’ik, maibé sente orgullu tanba Santu Padre ida bele vizita rai Timor. “Iha momentu ne’ebá ema husi munisípiu tuun hotu mai Díli, labarik ki’ik sira mak hela iha uma,”nia hateten.
Tanba ne’e, nia dehan tempu to’o ona atu ema hotu-hotu presiza fó kontribuisaun ba dezenvolvimentu nasionál nune’e povu hotu-hotu bele sente moris iha domin, pás, justisa, laiha diskriminasaun no seluktan.
“Slogan uluk dehan mate ka moris ukun rasik aan, ema barak mate iha ai-laran sai mártire tanba hetan violasaun, torturasaun, liuhusi masakre sira ida ne’e kontribuisaun konkretu ba libertasaun ba pátria, agora kontribuisaun ba dezenvolvimentu nasionál agora presiza responsabilidade no servisu ba o-nia rai, la presiza hein ema seluk,” padre ne’e hateten.
Iha sorin seluk, Padre Paulo Maya, heteten vizita Papa Santu Paulu II mai Timor-Leste iha signifika bo’ot ba Timoroan sira ninia prosesu luta ba independénsia.
“Ba ita Igreja Timor atuál Santu João Paulu II ninia lembransa ne’ebé importante teb-tebes atu ita lahaluhan mak vizita sai grasa, bensaun no domin katak Maromak besik ita no la husik ita iha terus laran, tanba ita moris iha situasaun defisil, ita moris iha perseguisaun, terór, intimidasaun, izolada tanba laiha liberdade,” dehan saserdote ne’e.
Nia hateten, antes Papa São João Paulo II ninia vizita mai ita-nia rain, Timor-Leste hanesan rai ida ne’ebé izolada iha mundu tanba komunidade internasionál barak mak seidauk koiñese saida mak Timor-Leste.
Tanba ne’e, nia dehan hosi istória moruk ne’ebé akontese iha pasadu maka apela ba joven sira atu sai masin no naroman ba mundu katak Timoroan tenke sai ezemplu ba ema seluk.
Notísia relevante :Papa João Paulo II vizita TL, juventude realiza manifestasaun aberta dahuluk
Jornalista: Jesuína Xavier
Editor: Agapito dos Santos
