DILI, 16 outubru 2023 (TATOLI)-Komisaun Nasionál Eleisaun (CNE-sigla portugués),durante fulan rua fó ona edukasaun sivika ba sidadaun hamutuk 25.750 iha territóriu Timor-Leste liga ho eleisaun xefe suku ne’ebé maka sei hala’o iha loron 28 fulan-outubru 2023.
“Desde fulan-agostu to inisiu fulan-outubru tinan-ne’e , CNE Timor-Leste realiza edukasaun sívika ho nia frekuénsia ba dala 226 ne’ebé kobre iha territóriu laran tomak ba suku no aldeia sira iha área rurál hodi promove no esklarese ba sidadaun sira kona-ba importánsia hosi eleisaun lideransa komunitária ne’e rasik no tuir orientasaun lei nú. 9/2016 nian,” Vise Prezidente CNE, Domingos Barreto, hateten ba TATOLI, iha Colemra Dili, segunda ne’e.
Notísia Relevante :CNE Oé-Cusse ensera edukasaun sívika iha Pante Makasar prepara ba eleisaun suku
Nia dehan daudaun ne’e, Komisaun Nasionál Eleisaun termina ona programa edukasaun sivika ba sidadaun sira, nune’e bele fó biban ba Servisu Tékniku Administrasaun Eleitorál (STAE) atu fó edukasaun sivika ba votante sira hodi partisipa masímu iha eleisaun xefe suku.
“Bainhira ami fó edukasaun sívika ba partisipante sira iha suku to’o aldeia ami iha dezafiu boot ida mak laiha alterasaun lei kona-ba 50+1 ne’e tanba tenke manan maiória, ezemplu iha votante 100 mak kandidatu ida tenke iha liu ema na’in-50 ka 51 ba leten se la liu ida-ne’e mak sei iha segunda ronda ba 13 novembru tinan ne’e. Agora ba xefe aldeia mak liu 50+1 mak eleisaun sei akontese iha momentu ne’ebá kedas,”nia informa.
Vise Prezidente espera iha Governu liuhosi Ministériu Administrasaun Estatál (MAE) sei halo alterasaun ba lei ne’ebé regula kona-ba rezultadu eleisaun ne’ebé hateten kandidatu xefe suku ida tenki manán ho votus 50+1.
Notísia Relevante :CNE halo edukasaun sívika iha Covalima finaliza ona
Jornalista: Osória Marques
Editór : Agapito dos Santos
