SEKOMS sei dezenvolve sentru informasaun suku
BOBONARO, 16 outubru 2023 (TATOLI) – Sekretáriu Estadu Komunikasaun Sosíal (SEKOMS), Expedito Dias Ximenes, hateten IX Governu kontinua implementa Programa Naroman ba Suku, maibé muda fali nia naran ba sentru informasaun suku.
IX Governu kria sentru informasaun suku ne’e ho objetivu atu promove koñesimentu sidadaun hotu-hotu nian kona-bá notísia atualidade, nasionál no internasionál.
Notísia Relevante:Joven na’in-13 hosi Lontas konklui ona formasaun jornalizmu bázika
“Oras ne’e dadaun IX governu haree hela oinsá atubele hadi’ak, karik buat balu ke iha Naroman ba Suku ne’ebé VIII Governu nian, IX Governu muda ba sentru informasaun suku. Buat ne’ebé ulun ladún di’ak karik, governu ida-ne’e atu hadi’ak halo di’akliu,” nia informa ba jornalista sira iha edifísiu Rádiu Komunidade Maliana, segunda ne’e
Programa ne’e VIII governu estabelese ona iha suku 26 iha territóriu laran tomak no tau ona ekipamentu balun, maibé iha fatin balu to’o agora seidauk utiliza.
Tanba ne’e IX governu kria ona ekipa ida atu ba halo observasaun, karik identifika balu konklui ona sei halo inaugurasaun.
“Ita sei haree saida mak presiza hadi’ak, maibé ida-ne’e osan estadu ninian, ita tenke haree ho didiak, atu osan estadu sosa ekipamentu sira-ne’e labele estraga, labele tau de’it ekipamentu iha ne’ebá depois komunidade la hatene uza, ida-ne’e mak atubele hare didi’ak,” nia katak.
Nia hatutan, programa SIS ne’e iha mós diálogu komunitária atu nune’e komunidade bele rona programa ne’ebé IX Governu atu halo no governu mos bele rona problema no difikuldade saida maka komunidade sira enfrenta.
Notísia relevante: SEKOMS asina akordu ho mídia imprime lima distribui jornál ba munusípiu
Jornalista: Sérgio da Cruz
Editór: Evaristo Soares Martins
