DILI, 17 outubru 2023 (TATOLI)–Primeiru-Ministru (PM), Kay Rala Xanana Gusmão, tersa ne’e, simu vizita hosi Embaixadora Noruega iha Indonézia no Timor-Leste, Rut Krüger Giverin.
“Ha’u vizita dala-rua ona iha ita-nia rai furak ne’e, ha’u kontente tebes atu mai iha ne’e. Ha’u foin hala’o sorumutuk ho Primeiru-Ministru no ha’u-nia onra boot tebes atu hasoru nia, rona kona-ba ninia viajen ne’ebé naruk tebes tanba iha funsaun lideransa barak ba nasaun joven ida-ne’e, nia esplika ba ha’u vizaun no planu sira hosi nia Governu foun,” Rut Krüger Giverin, hateten hafoin hasoru Xefe Governu, iha Palásiu Governu, tersa ne’e.
Notísia relevante : Embaixadór EAU hato’o konvite COP28 ba PM Xanana
Diplomata ne’e dehan, nasaun hotu sempre hasoru dezafiu, maibé sempre iha dalan hodi bele rezolve.
“Ha’u mós hetan inspirasaun boot no enkoraja tebes atu rona prespetiva hosi Governu foun atu investe iha dezenvolvimentu ekonómiku iha ne’e, liu-liu iha infraestrutura. Ne’ebé kontente tebes tanba iha ne’e no sente onra tebes tanba hasoru malu ho Primeiru-Ministru rasik,” nia akresenta.
Embaixadora dehan, daudaun ne’e Noruega laiha programa dezenvolvimentu espesífiku ida iha Timor-Leste, maibé Noruega envolve maka’as ona iha tinan hirak antes ne’e hodi ajuda estabelesimentu fundu petrolíferu.
“Agora daudaun, ita laiha programa espesífiku foun, antes ne’e iha programa rua ne’ebé serbisu kona-ba feto nia direitu no vítima violénsia seksuál, maibé daudaun, ita laiha programa espesífiku ruma ne’ebé ita serbisu hela,” nia tenik.
Jornalista : Antónia Gusmão
Editora : Julia Chatarina
