DILI, 17 outubru 2023 (TATOLI)—Governu fó fiar ba Gráfika Nasionál emprime buletin votu ba xefe suku períodu 2023-2030 iha eleisaun suku 2023 nian ne’e, ho montante orsamentu hamutuk $332,500.
Notísia Relevante: Kandidatu xefe suku iha territóriu nasionál hamutuk 2.117
“Ami agora daudaun hetan kontratu hosi Estadu hodi emprime buletin ba xefe suku nian,” Jerente Gráfika Nasionál, Herlambang Miady, hateten ba Agência Tatoli iha Grafika Nasionál Taibesi, tersa ne’e.
Herlambang hatutan, hosi osan $332,500 ne’e hodi emprime buletin votu livru hamutuk 19.000 no kada livru iha folla 50 no totál folla hamutuk ezemplár 950.000, ida-ne’e totál hosi munisípiu hotu.
Tanba, tuir nia, medida buletin votu mak la hanesan tanba bazeia ba númeru kandidatura, tanba iha balun kandidatura to’o 14 ka liu, nune’e medida hosi buletin votu ida ba ida la hanesan, agora daudauk parte grafika nian verifika hela kandidatu barak liu mak 14 ne’e.
“Prosesu daudaun ne’e la’o hela no ita hahú ona emprime buletin votu iha loron 14 outubru, no tuir data determina iha 23 outubru. Maibé, ida-ne’e ita bele dehan tempu limitadu tebes ba ita. Prosesu ne’e lori tempu naruk maibé ami tenta no koko esforsu atu finaliza tuir data ne’ebé mak termina ona. To’o ohin loron, munisípiu ne’ebé ita finaliza ona mak Lautém ho Baucau no Manatuto mós besik ramata ona. Ba munisípiu seluk iha hotu ona prosesu emprime nia-laran,” nia esplika.
Maibé, nia dehan, antes atu emprime reprezentante kada munisípiu nian mai hodi halo verifikasaun ba naran no foto sira, nune’e karik la moos presiza halo loos hodi bele emprime no labele mosu sala ruma.
Husu kona-ba dezafiu, nia hatán, situasaun mak nune’e maibé la sai dezafiu ida ba Gráfika Nasionál hodi halo prosesu impresaun.
“To’o agora laiha problema iha impresaun maibé ita só antesipa de’it tanba tempu mak limitadu tebes. Ita la fó sala maibe situasaun mak hanesan ne’e, saida de’it mak bele ita tenke halo, tantu atu hasa’e tarefa servsiu nune’e labele tarde, to’o agora laiha problema,” nia dehan.
Nia hateten, ba impresaun ne’e Governu mak fó konfiansa ba Gráfika Nasionál hodi prosesa no emprime buletin votu ba xefe sura iha territóriu nasionál.
“Tempu mak limitadu hodi halo prosesu, nune’e ho dezisaun hosi Governu hili direta ita hodi realiza servisu, tanba antes ne’e iha 2016 mos ita mak prosesu. Ida-ne’e, ita mós fasilita atu bele la’o ho lais liu,” nia hateten.
Herlambang dehan, iha tinan 2016 iha suku 432 no agora sa’e ba 452 entaun períodu uluk ne’e ladún barak no agora mak emprime barak maibé ida-ne’e la’ós sai kestaun.
“Entaun ita halo komparasaun ne’e agora ne’e emprime brak liu antes tinan 2016 nian no konserteja nia medida la henesan,” nia dehan.
Jornalista : Osória Marques
Editór : Cancio Ximenes
