PR Horta hasoru malu ho Prezidente Parlamentu UEA
ABUDABI, 16 outubru 2023—Prezidente Repúblika (PR), José Ramos Horta, segunda ne’e, ho delegasaun hala’o vizita ba Parlamentu Uniaun Emiradu Árabe (UEA) iha sidade Abu Dabhi, ne’eb’e simu direta hosi Prezidente Parlamentu Federál UEA, Majestade Saqr Ghobash.
Notísia Relevante: Horta konsidera investimentu direitu estranjeiru importante ba TL atinje objetivu dezenvolvimentu
Durante hasoru malu ne’e, tuir Jornalista Agência Tatoli Nelson de Sousa hato’o reportajen katak, PR Horta ho Prezidente Parlamentu UEA aborda kona-ba relasaun bilaterál liuliu iha área polítika no ekonómia.
“Prezidente Parlamentu hakarak vizita Timor Leste. Ha’u hateten, favór mai, ha’u simu kedas. Sira simpatia loos ho Timor no oinsá apoia Governu federál nia inisiativa ruma tulun Timor-Leste,” PR Horta hateten ba jornalista sira hafoin ramata enkontru ho Prezidente Parlamentu Federál UEA, Majestade Saqr Ghobash.
Nune’e, PR Horta husu bankada Parlamentár iha lejislatura daneen no VIII Governu Konstitusionál atu hakerek karta forma hodi konvida Parlamentu UEA vizita Timor-Leste nu’udar parte ida hosi diplomásia.
Xefe Estadu apresia partisipasaun feto iha Parlamentu UEA ne’ebé hetan pursentu singnifikativu hanesan ho Timor-Leste.
Enkuantu iha enkontru ne’ebé la’o ho amigável tebes, Prezidente Parlamentu Federál UEA, Majestade Saqr Ghobash. espresa hodi hametin relasaun ho Timor-Leste no apresia ba Timor-Leste hodi promove fraternidade umana.
Iha enkontru ne’e, akompañadu hosi Vise Primeiru Ministru koordenadór asuntu Ekonomiku no Ministru Turizmu no Ambiente, Francisco Kalbuady Lay no Vise Ministra ba ASEAN, Milena Rangel.
Notísia Relevante: PR Horta-Prezidente EAU diskute hametin kooperasaun iha área investimentu
Jornalista : Nelson de Sousa
Editór : Cancio Ximenes
