PRADET apoia animál no soru-tais ba grupu feto RAEOA
OÉ-CUSSE 17 outubru 2023 (TATOLI – Programa Fatin Hakmatek ka Psychosocial Recovery and Development in East Timor (PRADET), tersa ne’e apoia animál hanesan bibi no manu no soru-tais ba feto sira hamutuk grupu ualu iha Rejiaun Administrativa Espesiál Oé-Cusse Ambeno (RAEOA) hodi haki’ak no soru-tais hodi kontribui rendimentu ba família atu redús violénsia doméstika.
Koordenadora PRADET Oé-Cusse, Domingas da Cunha, informa, programa ne’e realiza hetan apoia fundu hosi Autoridade RAEO fokuliu ba atividade hakiak animál, soru-tais no atividade negósiu nian.
Tuir nia, objetivu hosi programa ne’e, fokuliu ba família kbiit la’ek sira, tanba tuir PRADET nia haree, violénsia doméstika akontese mai hosi família.
“Hosi inisiativa ne’e maka PRADET hakarak apoia programa ne’e, nune’e hala’o atividade ne’e iha baze ba família sira, atu labele hasoru violénsia bazea ba jéneru, no benefísiu hosi atividade ne’e, saida maka PRADET apoia, atu labele sai independénsia liu ba mane sira maibé feto mós bele organiza no sira mós bele hala’o atividade, no rendimentu ne’ebé sira hetan uza hodi sustenta nesesidade família,” Domingas da Cunha, ko’alia iha suku Cunha, sub-rejiaun Pante Makasar.
Notísia relevante: Autoridade RAEOA selebra kontratu ho asosiasaun ualu tau matan ba problema sosiál
Prezidente Autoridade RAEOA, Arsénio Paixão Bano, esplika, autoridade apoia oranizasaun sosiedade sivíl sira, ho razaun atu kontribui defende direitu labarik, feto vulnerável hodi haforsa ekonomia família.
“Autoridade RAEOAservisu ho PRADET kuaze tinan barak ona, razaun ida tanba servisu direitu ba iha grupu feto sira, liuliu feto sira-ne’ebé ho ekonomia fraku, no mós ita-nia númeru violénsia doméstika iha RAEOA aas tebes, entaun presiza organizasaun ida maka servisu atu hamenus ida-ne’e,” Arsénio Paixão Bano hateten.
Nia informa, kada tinan Autoridade apoia la’os PRADET de’it maibé apoia ba organizasaun sosiedade sivíl sira seluk, hanesan AlfeLa, AFMEF ho grupu Uma Pás Oé-Cusse.
“Ne’e ita apoia tanba ita hakarak hamenus problema violénsia doméstika ba labarik ho feto sira, atu haforsa ekonomia família uma laran,” nia afirma.
Entretantu, grupu feto ualu, kada grupu envolve feto na’in-neen, ne’ebé hetan apoia hosi PRADET mai hosi sub-rejiaun haat, hanesan iha Pássabe grupu ida ho atividade soru-tais.
Iha sub-rejiaun Nítibe, grupu ida realiza iha suku Ban-Afi iha aldeia Hautefo ho atividade soru-tais, iha sub-rejiaun Oésilo grupu ida realiza iha suku Bobometo aldeia Oébaha ho atividade soru-tais.
Nune’e mós iha sub-rejiaun Pante Makasar iha grupu tolu, iha suku Cunha no Lifau ho atividade haki’ak animál hanesan manu no bibi no iha suku Lalisuk haki’ak fahi.
Notísia relevante: RAEOA-AFMEF selebra kontratu dezenvolve grupu feto 34
Jornalista: Abílio Elo Nini
Editór: Evaristo Soares Martins
