DILI, 17 outubru 2023 (TATOLI) – Ministériu Edukasaun (ME) planeia atu rekruta, iha tinan oin, profesór 100-resin iha área espesífika hodi apoia prosesu aprendizajen ba Eskola Tékniku Vokasionál (TEKVOK) hamutuk 51 iha territóriu.
Diretór Nasionál Ensinu Sekundáriu Jerál no Tékniku Vokasionál (ESTV), Fernando Mouzinho Gama, informa, iha 2024, sira sei loke konkursu públiku ba manorin sira iha área espesífika hodi bele ensina estudante sira atu sai ema ne’ebé iha kompeténsia hodi kompete iha merkadu traballu.
“Ita iha ona polítika ida ne’ebé ita rasik prevee ona orsamentu rihun $80-resin atu loke prosesu konkursu públiku hodi halo rekrutamentu ba profesór produtivu sira iha área espesífika hodi tulun estudante sira iha prosesu aprendizajen”, dirijente informa iha Vila Verde, ohin.
Daudaun ne’e, parte diresaun TEKVOK ministériu nian rejista ona totál profesór ne’ebé hanorin iha eskola 51 iha territóriu ne’e hamutuk 775. Profesór sira ne’e hanorin iha programa hotu inklui sosiokulturál nomós siénsia nian, maibé manorin espesífiku iha área importante sira foin maka 200-resin de’it.
“Ne’e seidauk sufisiente nunne’e ita prevee ona orsamentu ba tinan oin atu rekruta tan profesór 100 resin”, reitera.
Ministériu Edukasaun planeia halo rekrutamentu tanba iha eskola tékniku vokasionál ne’e rejista kursu hamutuk 19, maibé daudaun ne’e funsiona de’it 17. Kada kursu presiza dixiplina entre haat no lima. Haree ba kestaun ne’e maka ministériu konsidera katak profesór ba dixiplina espesífika sira seidauk sufisiente no presiza rekruta tan.
Notísia relevante: Eskola Tékniku Vokasionál presiza manorin 75 atu apoia prosesu aprendizajen
Husi dosente 775 ne’ebé hanorin iha eskola TEKVOK ne’e na’in-575 maka hetan ona formasaun jerál ne’ebé apoiu husi INFORDEPE no profesór 200 ne’ebé hanorin área espesífika seidauk partisipa formasaun tanba ministériu rasik seidauk iha rekursu espesífiku atu disponibiliza formasaun ba sira.
Ba futuru, Ministériu Edukasaun no Institutu Nasionál Dezenvolvimentu Mão de Obra (INDMO) kria akordu ida atu apoia formasaun ba profesór TEKVOK sira iha área espesífika hodi bele tulun prosesu aprendizajen ida di’ak no kualidade ba alunu sira.
Notísia relevante: Profesór sira husi eskola tékniku vokasionál partisipa formasaun espesífika – TATOLI Agência Noticiosa de Timor-Leste
Jornalista: Tomé Amado
Editora: Maria Auxiliadora
