DILI, 31 jullu 2023 (TATOLI) – Eskola Sekundária Tékniku Vokasionál (ESTV) 51 iha territóriu presiza, iha tinan ne’e, profesór 75 atu reforsa prosesu aprendizajen iha estabelesimentu eskolár sira ne’e, informa Diretór Nasionál Edukasaun Tékniku Vokasionál, Agostu Pereira.
Agostu Pereira dehan diresaun rejista atualmente profesór ne’ebé maka hanorin iha ESTV hamutuk 1.004, kompostu husi permanente 610 no kontratadu 394.
Maski ho númeru ne’ebé mak iha, diresaun no parte eskola sira halo avaliasaun no identifika katak númeru profesór refere seidauk sufisiente atu apoia atividade aprendizajen. Tanba ne’e, sira sujere atu Ministériu Edukasaun bele aumenta tan manorin.
Ho kestaun falta dosente maka diretór Agostu Pereira submete ona pedidu sira ne’e ba ministériu atubele hanoin lisuk, nune’e bele hadi’a no dezenvolve ESTV iha nasaun ne’e ba tinan lima nia laran, tanba tuir nia observasaun katak kolokasaun manorin sira iha eskola la tuir nesesidade.
Profesór 75 ne’ebé diresaun propoin ne’e sei koloka ba kursu hamutuk 13 ne’ebé konsidera falta manorin. Kursu tékniku kontabilidade presiza profesór na’in-ualu, komérsiu rua, informátika 20, eletrisidade ualu, eletrónika haat, konstrusaun sivíl haat, turizmu no otelaria lima, peska rua, produsaun agraria ida, kursu portugés 11, inglés lima, matemátika tolu no biolojia rua.
Profesór 75 ne’ebé diresaun rekomenda ne’e mai husi ezersísiu ida, tanba durante halo akompañamentu ba kuadru pesoál no karga oráriu kada eskola ne’ebé eziste, haree katak iha manorin barak maka hetan kolokasaun la afetivu, signifika iha kursu ida dalaruma presiza na’in-rua de’it, maibé koloka fali tolu. Entaun, ida seluk laiha funsaun. Nomós iha kursu balun presiza profesór haat, maibé koloka de’it tolu, entaun la sufisiente atu kompleta karga oráriu 640 ne’ebé hakerek ona.
“Iha eskola tékniku vokasionál ho kursu kontabilidade jerál iha módulu hamutuk 17 ho karga orária 640, maibé iha profesór na’in-rua de’it maka hanorin ne’e la sufisiente. Entaun ita presiza aumenta profesór rua hodi apoia prosesu aprendizajen ba estudante sira. Ihakursu Kkomérsiu nian loloos presiza profesór na’in-lima, maibé kolokasaun profesór ne’e liu tiha na’in-neen entaun ida la hetan ona ninia karga oráriu, nune’e nia sai abandonadu tiha iha eskola ne’e”, nia esplika.
Liuhusi identifikasaun sira ne’e hotu maka Diresaun Nasionál Tékniku Vokasionál halo ona prosesu avaliasaun katak presiza tan profesór 75 ba eskola 51 ne’ebé eziste atubele reforsa prosesu aprendizajen ba estudante hamutuk 12.811.
Jornalista: Tomé Amado
Editora: Maria Auxiliadora
