OÉ-CUSSE, 17 outubru 2023 (TATOLI – Diretór Nasionál Apoia Administrasaun Suku hosi Ministériu Administrasaun Estatál (MAE), Celestino Marques, fó-sai katak, xefe suku foun sira-ne’ebé daudaun ne’e kandaditu atu konkore iha eleisaun suku iha loron 28 outubru, sei simu pose iha loron 28 novembru 2023 ne’e.
Notísia relevante: Kandidatu xefe suku iha territóriu nasionál hamutuk 2.117
Tuir nia, Governu liuhosi Ministériu Administrasaun Estatál (MAE), tau ona iha Planu Asaun Anuál (PAA) 2024 nian, atu atribui motorizada no uniforme ba xefe suku sira.
“Agora daudaun mak eziste iha suku 442, ida-ne’e ita orsamentu inklui suku foun sia, atu sosa motorizada foun, atu fó ba sira hodi hala’o servisu, bainhira sira eleitu iha eleisaun suku ne’e, iha 28 novembru hetan tomada pose hotu, Governu prepara kondisaun balu ba sira, ida maka motorizada no prepara farda foun ba sira,” Celestino Marques, ko’alia iha Oé-Cusse, tersa ne’e.
“Ida-ne’e ami hatama ona proposta ba iha OJE 2024 ninian, bainhira hetan aprovasaun depois ita prosesu,” nia argumenta.
Kona-bá transporte hanesan karreta laiha, tanba suku sira, hanesan lideransa komunitáriu, Governu só fó apoia no kria kondisaun balu ba motorizada, hodi uza halo servisu bele asesu to’o aldeia no bairru sira iha área rurál.
Diretór Nasionál ne’e seidauk bele fó-sai proposta orsamentu kona-ba motorizada ne’e tanba sei tau ba PAA 2024 nian.
“Tipu motorizada sira-ne’e ita labele temi sai nia marka saida, tanba lei aprovizionamentu la permite atu fó-sai nia marka ba públiku, maibé ita tau de’it nia espesifikasaun iha proposta ne’e,” nia subliña.
Maibé kona-bá motorizada tuan ne’ebé daudaun ne’e xefe suku atuál sira uza hela, sei hein desizaun hodi Governu nian, atu atribui ka lelaun depende desizaun Governu nian.
Notísia relevante: Xefe Estadu enkoraja feto kandidata aan iha eleisaun Suku
Joranlista: Abílio Elo Nini
Editór: Evaristo Soares Martins
