Feto na’in-haat hosi Oé-Cusse sei kompete ho mane 89 iha eleisaun suku
OÉ-CUSSE 18 outubru 2023 (TATOLI – Sekretariadu Tékniku Administrasaun Eleitóral (STAE), Rejiaun Administrasaun Espesiál Oé-Cusse Ambeno (RAEOA), simu ona lista kandidatura xefe suku hosi suku 18 no sub-rejiaun haat (4) hamutuk 93.
Notísia relevante: Governu aloka $332,500 emprime buletin votu ba xefe suku livru 19.000
Diretora STAE Oé-Cusse, Luiza da Costa, hateten, hosi kandidatura 93 ne’e iha feto na’in-haat, submete ona dokumentu kandidatura iha meza asembleia suku iha sesta semana kotuk (13 outubru 2023), hodi kompete ho mane sira hamutuk 89 iha eleisaun suku ne’ebé sei akontese iha loron 28 outubru 2023 ne’e.
“Lista feto na’in-haat de’it, ne’ebé partisipasaun feto ki’ik tebes kompara ho mane sira hamutuk na’in-89, ne’ebé kandidatu xefe suku iha Oé-Cusse hamutuk na’in-93,” Luiza da Costa ba Tatoli iha Oé-Cusse, kuarta ne’e.
Nia informa, hosi kandidatura feto na’in-haat ne’e, maihhosi suku Nipani ida, suku Costa ida, uku Malelat ida no suku Abani ida.
“Hafoin kandidatura xefe suku sira kompleta hotu dokumentu, ita submete ba iha nasionál ba preparasaun prodús boletín votu ba xefe suku sira,” nia afirma.
Entretantu, tuir dadus kandidatura xefe suku na’in-93 ne’e mai hosi suku 18 no sub-rejiaun haat, hanesan, iha sub-rejiaun Pássabe kandidatura hamutuk na’in-14, komposta hosi suku Abani na’in-11, mane 10 no feto ida, iha suku Malelat haat, mane 3 no feto ida.
Iha sub-rejiaun Oésilo kandidatura hamutuk na’in-14 maioria mane hotu, komposta hosi suku Bobometo na’in-lima, suku Usitasa’e na’in-neen no suku Usitaqueno na’in-tolu.
Iha sub-rejiaun Nítibe kandidatura hamutuk na’in-25 maioria mane hotu, komposta hosi suku Ban-Afi na’in-hitu, Bene-Ufe na’in-haat, Lela-Ufe na’in-ualu, Suni-Ufe na’in-rua no suku Usitaku na’in-haat.
Iha sub-rejiaun Pante Makasar kandidatura hamutuk na’in-37, komposta hosi suku Bobokase na’in-haat, Cunha na’in-haat, Costa na’in-hitu, mane neen no feto ida, Lalisuk na’in-tolu, Lifau na’in-lima, Naimeko na’in-hitu, Nípani na’in-haat mane tolu no feto ida, suku Taiboko na’in-tolu.
Notísia relevante: Kandidatu xefe suku iha territóriu nasionál hamutuk 2.117
Jornalista: Abílio Elo Nini
Editór: Evaristo Soares Martins
