Governu sei rekruta ofisiál na’in-tolu iha 2024 atu apoia administrasaun suku
OÉ-CUSSE, 18 outubru 2023 (TATOLI – Governu liuhosi Ministériu Administrasaun Estatál (MAE), sei halo rekrutamentu ba ofisiál na’in-tolu atu apoia servisu administrasaun suku sira iha territóriu nasionál iha tinan 2024 nian.
Notísia relevante: Governu sei avalia suku hitu iha Oé-Cusse molok válida sai suku foun
Diretór Nasionál Apoia Administrasaun Suku hosi Ministériu Administrasaun Estatál (MAE), Celestino Marques, informa, ofisál na’in-tolu koloka suku sira atu apoia servisu administrasaun suku, asuntu finansa no sosiál nian.
“IX Governu tenta ita atu hadi’a servisu sira, atu aumenta rekursu umanu iha nível suku idak-idak, nune’e tulun xefe suku sira atubele halo melloramentu servisu atendimentu administrativu iha suku sira-nia laran, bele la’o lais no mamar,” Celestino Marques, ko’alia iha Oé-Cusse, tersa ne’e.
Diretór nasionál ne’e akresenta, planu ida-ne’e, Governu aprova ona liuhosi dekretu-Lei númeru 18/2023, alterasaun hosi dekretu-Lei númeru 6/214, kona-bá rekursu materiál no insentivu finanseira lideransa komunitáriu nian ba kriasaun servisu administrasaun suku.
“Katak, iha 2024, sei hahú halo rekrutamentu ba ema na’in-tolu tán, atu koloka iha suku sira hotu, iha tinan oin, ita sei iha sekretáriu suku ida, ita sei rekruta tán ofisiál administrasaun ida, ofisiál finansa ida no ofisiál ba asuntu sosiál na’in-ida,” nia subliña.
Daudaun ne’e MAE prepara ona karta sirkulár ida, hodi regula kona-bá mandatu, tanba orientasaun ba polítika ne’e sirkula ba munípiu sira.
“Ita rekruta sira, sei kontratu ho sira, depois ita haree ninia mekanizmu kona-bá rekrutamentu atu regula sira-nia mandatu ne’e oinsá, ita sei regula iha sirkulár ne’ebé maka ami sei prepara iha tempu badak,” nia afirma.
Notísia relevante: Xefe suku foun sei simu pose iha 28 novembru no simu motorizada foun iha 2024
Jornalista: Abílio Elo Nini
Editór: Evaristo Soares Martins
