BOBONARO, 18 outubru 2023 (TATOLI) – Polísia Nasionál Timor-leste (PNTL) munisípiu Bobonaro, koordena ona ho Batallaun Orden Públika (BOP) kompañia Delta Soso no FALINTIL- Forsa Defeza Timor-Leste (F-FDTL) destakamentu postu Tunubibi atu servisu hamutuk hodi asegura loron finadu ne’ebé sei akontese iha loron 02 fulan-novembru tinan 2023 nian.
Servisu konjunta autoridade seguransa no defeza ne’e hala’o kedas iha semana liubá, hahú iha serimónia aniversáriu ezisténsia Koléjiu Infante de Sagres Maliana ba dala-75 no loron nasionál liberdade imprensa ba dahuluk ne’ebé realiza iha postu administrativu Balibo.
Notísia relevante: PNTL Bobonaro sei asegura materiál eleisaun nu’udar entidade alta
“Ita enkontru antisipadamente, ita reuni ho ita-nia rekursu, enkontru mós ho ita-nia forsa amiga sira, tanba ita iha Unidade Espesiál, Batallaun Orden Públika (BOP), ita mós iha FDTL, iha eventu boot sira-ne’e, klaru katak forsa rua ne’e hanesan lutu nasaun nian, ida lutu externa no ida lutu interna,” Komandante Polísia Nasionál Timor-Leste (PNTL), munisípiu Bobonaro, António de Sá Benevides hateten.
António de Sá realsa, instituisaun seguransa rua ne’e sei halo patrullamentu iha fatin hotu-hotu hodi kontrola komunidade no joven sira-ne’ebé tenta kria instabilidade.
“Iha fatin balun, ita-nia individu, grupu balu aproveita situasaun sira hanesan ne’e, sira halo problema, entaun ne’e ladún di’ak, la relevante ho ita-nia kultura no kustume,” nia fó hanoin.
Nia apela ba komunidade liuliu ba joven sira-ne’ebé hanesan kamada importante ba futuru nasaun nian atu kontribui hodi mantein seguransa iha idak-idak nia suku no bairru hodi fó susesu ba loron ne’e.
Tuir nia, loron finadu hahú 01 to’o 02 ne’e nu’udar kustume no identidade Timor nian ne’ebé hanesan loron importante ba família sira atu omenajen ba matebian ka saudozu sira-ne’ebé husik ona mundu ne’e.
“Entaun ita hotu kumpre nafatin devér ho misaun atu reza, sunu-lilin tau ba sira atu fó nafatin omenajen ba sira, nune’e sira mós iha mundu seluk bele tau-matan ba ita,” nia dehan.
Komandu mós prepara ona planu operasaun no halo sosializasaun ba medida preventiva sira atu ema hotu kontribui no apoia seguransa durante oras 24 nia laran.
Notísia relevante: Komandante Mauluta husu membru PNTL Bobonaro kumpri orden Xanana Gusmão
Jornalista: Sérgio da Cruz
Editór: Evaristo Soares Martins
