BOBONARO, 18 outubtu 2023 (TATOLI) – Komandante Polísia Nasionál Timor-Leste (PNTL), munisípiu Bobonaro, António de Sá Benevides, kuarta ne’e halo enkontru ho Ofisiál Polísia Suku (OPS) sira hodi prepara planu operasaun no diskute kona-bá risku ho ameasa sira-ne’ebé posibilidade akontese iha eleisaun suku ne’ebé sei realiza iha loron 28 fulan-outubru 2023.
Superintendente Xefe ne’e esplika, PNTL kontinua kumpri misaun ne’ebé konsagra ona iha Konstituisaun Repúblika Demokrátika Timor-Leste (RDTL), artigu 147 katak instituisaun PNTL hanesan aparalu estadu hodi defenda legalidade demokrátiku, garante sidadaun sira-nia seguransa internu no sira-nia bens
Nia subliña, autoridade seguransa sei la permite eleitór sira utiliza atributu organizasaun arte-marsial no arte-rituál, bandu mós leitór sira lori sasán kro’at partisipa iha eleisaun.
“Ita-nia lei arma branka bandu ida-ne, entaun ita tenke koopera, tanba ita hare agora, kandidatu sira hotu espresa sira-nia sentimentu kontente, tanba agora ne’e entusiazmu loos, kandidatu feto no mane, joven mós tama hotu, sira hakarak atu partisipa iha fasta demokrasia ne’e,” nia katak.
Komandante António de Sá fó mós orden ba membru efetivu komandu PNTL munisípiu Bobonaro atu firme no kumpri lei ne’e hodi asegura eleisaun suku, tanba ne’e autoridade seguransa mós sei la tolera kualkér sidadaun ne’ebé ho kondisaun lanu tenta perturba iha eleisaun suku ne’e.
“Ita iha lei eleisaun, normalmente eventu sira hanesan eleisaun, iha lei definie tiha ona katak proibe momentu kuandu ita realiza ita-nia direitu de votu ba eleisaun, ita la permite ba votante sira ba ho kondisaun lanu,” nia informa ba jornalista sira, hafoin enkontru.
Komandu fó orientasaun ba OPS sira atu servisu hamutuk ho autoridade lokál, veteranu, lia-na’in no kamada sira hotu iha munisípiu Bobonaro.
Nia apela ba komunidade liuliu membru organizasaun arte-marisiál ne’ebé eziste iha aldeia 193 no suku 50, atu koopera ho autoridade seguransa hodi garante situasaun pás no hakmatek iha eleisaun ba órgaun suku.
Nia fó hanoin ba komunidade hotu-hotu presiza mantein kontribuisaun no kolaborasaun ne’ebé mak halo tiha ona iha eleisaun prezidensiál no parlamentár.
“Ita susesu iha Bobonaro laiha problema, tanba ne’e ita-nia epetativa, eleisaun ida-ne’e mai, tanba festa ne’e festa povu ninian, povu sei determina ka hili nia reprezentante atubele ukun sira, xefe suku, xefe aldeia ne’ebé ita atu hili ne’e, ita-nia ema,timoroan, suku ne’e ninia oan duni, entaun ita hotu-hotu fó kontribuisaun kria pás no estabilidade, nune’e ita partisipa ho ambiente ne’ebé familár,” nia apela.
Enakuntu tuir dadus, totál kandidatu xefe suku ne’ebé sei kompete iha eleisaun tinan ne’e hamutuk 198 komposta hosi feto 12 no mane 186.
Notísia relevante: Feto 12 iha Bobonaro sei kompete ho mane sira iha eleisaun lideransa komunitária
Jornalista: Sérgio da Cruz
Editór: Evaristo Soares Martins
