PR Horta hasoru Ministru Toleránsia no Koezisténsia EAU hametin relasaun bilaterál

DILI, 18 outubru 2023 (TATOLI)—Prezidente Repúblika (PR), José Ramos Horta, hasoru malu ho Ministru Toleránsia no Koezisténsia Emiradu Árabe Unidu (EAU), Nahyan bin Mubarak Al Nahyan, hodi ko’alia kona-ba hametin relasaun bilaterál entre nasaun rua.

Notísia Relevante: PR Horta-Prezidente EAU diskute hametin kooperasaun iha área investimentu

“Programa iha Emiratus ramata horisehik enkontru ho Ministru ba Toleránsia no Koezisténsia. No Ministru ne’e hateten ami hakfodak, tanba ami-nia Prezidente (EAU) rasik mak telefone ba ha’u (Ministru ba Toleránsia no Koezisténsia) no ministru sira seluk hotu-hotu tenke tau matan ba Prezidente hosi Timor-Leste nia (Prezidente Horta). Ha’u-nia alin no maun no Emiratus hakarak relasaun metin ho Timor-Leste,” PR Horta hateten ba jornalista sira hafoin ho delegasaun ramata no halo enkontru iha sidade Abu Dabhi.

Nia (Ministru Toleránsia no Koezisténsia) lahatene atu ko’alia saida maibé realidade Prezidente (EAU) kontente loos no hakarak hametin relasaun, nune’e fó hatene embaixador hotu, tanba ne’e derrepente buat balun laiha tama iha programa inisiál ne’e akontes.

Nune’e, nia dehan, ministru ne’e bolu fatin ne’ebe horisehik ba ne’e ninia uma no nia bolu kedas membru embaixador lubun ida sira-nia embaixadór, ne’ebe iha li’ur no balun lubun ida iha ne’e ho membru Governu balun no sira nia Parlamentu sira bolu hanesan council,” Horta hateten ba jornalista sira hafoin ramata enkontru iha sidade Abu Dabhi.

Antes ne’e, Prezidente Repúblika, José Ramos Horta, hasoru malu ona ho Prezidente EAU hodi ko’alia hametin relasaun bilaterál entre nasaun rua no reforsa kooperasaun liuliu iha área investimentu hanesan EAU bele apoiu investimentu iha Timor-Leste iha área agrikultura, seguransa alimentár, enérjia renovável, turizmu, dijitalizasaun, otél estrela lima no sentru konvensaun, rezidénsia ba estudante universitáriu no seluk tan.

Xefe Estadu hateten, EAU kria Ministériu Toleránsia no Koezisténsia ida-ne’e halo esforsu hametin unidade nasionál no toleránsia, tanba rai ida-ne’e halibur hosi Emiratu hitu ne’ebé uluk keta-ketak hafoin mak sira halo unifikasaun hahu ne’e mak bolu Emiradu Árabe Unidu hotu.

Sira hanesan Estadu federál ida kapitál mak Abudabi boot-liu, iha osan ne’ebé mai hosi mina no gás no finansia mós Dubai, hanesan aeroportu Dubai nian ne’ebé buat barak koñesidu mundialmente ne’e mai hosi Abudabi mós finansia Emiradu sira seluk.

Emiradu Árabe Unidu kompostu hosi Estadu hitu ne’e iha populasaun millaun rua (2), maibé totál populasaun millaun 10 no millaun ualu (8) mak ema hosi li’ur hanesan Nepal, Filipina, Bangladesh, Pakistaun, Índia no rai sira seluk, ne’ebé servisu iha fábrika, infraestrutura, médiku, CEO ne’ebé halo jestaun ba banku, buat hotu ho sufistikadu ezije ema estuda ho universitáriu boot ne’e mak halo EAU susesu boot.

Tanba, sira-nia polítika toleránsia, dahuluk simu malu Estadu federadu hitu, daruak sira mós loke odamatan ba mundu.

“Hanesan horisehik Ministru ba Toleránsia ne’e hateten, ami hakarak simu ema hosi li’ur mai iha ne’e, ami presiza sira-nia liman, kakutak hamutuk ho ami bele dezenvolve ami-nia rai. Ami simu sira ho fuan, laiha diskriminasaun no laiha falta respeitu no laiha trata ema ho aat ne’ebé mai hosi li’ur. Tanba ne’e, ema estranjeiru mai iha ne’e hotu-hotu kontente, tanba Emiratus sai boot tebe-tebes. Se lae, bele iha mina, maibé rai la dezenvolve tanba la dezenvolve de’it ho mina no osan, tanba laiha kakutak di’ak no lahatene halo polítika no diplomásia, la promove unidade nasionál entaun ema tauk atu mai,” PR Horta hateten.

Entretantu, ministériu ida-ne’e sira tenke halo esforsu tanba traballadór estranjeiru millaun ualu (8) ne’ebé hela no serbisu iha ne’e hosi nível badak liu to’o aas, sira konsidera rai ida-ne’e mós sira-nia uma.

Iha enkontru ne’e, akompaña hosi Vise Ministra ba asuntu ASEAN, Milena Rangel.

Notísia Relevante: PR Horta hasoru malu ho Prezidente Parlamentu UEA

Jornalista : Nelson de Sousa

Editór       : Cancio Ximenes