PR Horta kontente traballadora timoroan na’in-haat serbisu seguru iha Abudabi

ABUDABI, 18 outubru 2023 (TATOLI)—Prezidente Repúblika (PR), José Ramos Horta, kontente haree traballadora timoroan hamutuk na’in-haat ne’ebé hala’o serbisu ho seguru iha Abudabi.

Notísia Relevante: PR Horta ohin to’o Arábia Saudita partisipa simeira ASEAN

“Ha’u kontente loos haree traballadora hotu, sira mai liuhosi Ajénsia Nasionál INCANTO Group. Uluk, hau ko’alia ho INCANTO imi bele haree ko’alia ho Dubai no Abudabi ne’e di’ak no iha konfiansa tanba laiha problema. Ha’u la konkorda bainhira haruka ba rai balun, iha Abudabi ho Dubai ne’e iha konfiansa. Ha’u kontente, traballadora sira-ne’e hateten sira kontente loos iha ne’e, laiha problema no seguru,” PR Horta hateten ba jornalista sira hafoin hasoru malu ho traballadór timoroan iha otel Stregis Abu Dhabi.

Jornalista Agência Tatoli, Nelson de Sousa, relata Xefe Estadu louva traballadora timooan ne’e mezmu serbisu iha ne’e manán renumeratóriu ladún boot, maibé sira hatudu ho espíritu forte hanesan joven timoroan buka esperiénsia iha ema-nia rai.

“Maibé manán (renumeratóriu) ladún, bele dolar ita nian $300 no serbisu todan, maibé sira rasik hateten ami manán esperiénsia de’it tanba hakarak aprende buat ruma ne’e di’ak. Hanesan ha’u mós hateten beibeik, ba li’ur ne’e la’ós de’it tanba osan maibé hanesan esperiénsia no universidade di’ak ida, loron ruma fila ho koñesimentu di’ak,” nia hateten.

Iha fatin hanesan, traballadora timoroan, Gralha Arlete Jusefina Baquita, haktuir bainhira sira to’o iha Abu Dabhi empreza prepara buat hotu ona ne’ebé simu sira di’ak loos.

‘’Bainhira ami to’o iha rai Abu Dabhi empreza prepara buat hotu ona mai ami liuliu transporte hodi direta mai. Ami simu benvindu ho haksolok, nune’e la to’o semana serbisu no sira fahe ami serbisu ho pozisaun la hanesan balun kaiseru (iha supermerkadu, restorante). Hosi kontratu ne’ebé ami asina iha Timor ho kompañia Incanto ramata mak tinan rua de’it. Ranba, agora serbisu tinan ida ho balun ona, konseteza kontratu sei hotu iha tinan oin. Maibé sira hosi kompaña hakarak fó tan oportunidade mai ami depende ba serbisu, se ami konfortável bele estende tan,” nia dehan.

Nia dehan, tratamentu empreza nian sente di’ak tanba tuir akordu no kultura nasaun ne’e eziste fó tratamentu ba ema hotu hanesan laiha diskriminasaun hanesan rasa no relijiaun.

Notísia Relevante: Incanto Group asina akordu traballadór ho ajénsia Jobs Global

Tanba ne’e, nia parte sente kontente tebes tanba hetan oportunidade previleíju hanesan timoroan ida no joven jerasaun foun agradese tanba ema-nia nasaun bele loke oportunidade no óinsa kria kondisaun.

“Saláriu tuir kontratu sufisiente, maibé la foku liu ba renumerasaun no foku liu ba buka esperiénsia. Tanba, nu’udar jerasaun foun ita labele hanoin de’it ba osan, maibé ita tenke kria fundu ruma ba ita-nia esperiénsia mak oinsá ita bele kria buat ruma partilla ita-nia moris,” nia hateten.

Kona-ba difikuldade, nia hateten, konseteza moris iha ema-nia nasaun hetan difikuldade hanesan tentasaun no kolen, maibé ne’e esperénsia halo sira-nia-aan forsa nafatin, tanba hanesan joven labele halo aan fraku maibé tenke hasoru situasaun hotu-hotu ho brani katak feto mós bele.

Nune’e, traballadora timoroan hirak ne’e sente kontente bele hasoru malu ho Prezidente Repúblika tanba durante ne’e iha Abudabi timoroan la barak no úniku sira na’in-haaat de’it mak serbisu iha ne’e.

“Ho Prezidente ninian prezensa ami sente kontente bele mai hasoru diretamente. Maske ami-nia serbisu sente okupadu, maibé ami fó tempu ba Prezidente hodi hasoru tanba hakarak ko’alia ho Xefe Estadu hanesan aman ba nasaun. Rezultadu hosi enkontru ne’e, Prezidente hateten bele haruka tan timoroan mai iha ne’e,” nia hateten.

Nu’udar timoroan, sira mós sente kontente tanba IX Governu Konstitusionál iha planu atu estabelese embaixada Timor-Leste iha Abudabi.

Nune’e, Gralha Arlete, hato’o mensajen ba joven timoroan sira katak keta lakon konfiansa koko nafatin hasoru situasaun hotu, labele depende ba família no tenke sai ema-ne’ebé independente hodi hasoru situasaun hotu.

Bainhira iha oportunidade, tenke koko no hatudu ema ida-idak ninia pontensialidade ne’ebé iha nune’e ba futuru nu’udar timoroan lori Timor-Leste ba oin.

Notísia Relevante: PR Horta vizita muzeu Abrahamic Family House-Louvre iha Abu Dabhi

Jornalista : Nelson de Sousa

Editór       : Cancio Ximenes