OÉ-CUSSE 18 outubru 2023 (TATOLI – Sigarru ilegál kontinua sirkula iha Rejiaun Administrativa Espesiál Oé-Cusse Ambeno (RAEOA), tanba Autoridade seguránsa iha Oé-Cusse Ambeno menus rekursu umanu, hodi kobre área fronteira sira ho distánsia kilómetru 142.
Notísia relevante: PNTL Oé-Cusse menus rekursu umanu
Xefe Sesaun Operasaun Inspetór Xefe Polísia, Belarmino da Rosa, hateten, dezafiu ne’ebé seguránsa enfrenta, primeiru maka rekursu umanu la sufisiénte tanba geografikamente fronteira Oé-Cusse luan.
“Ida-ne’e mós menus konsiénsia hosi komunidade, laiha kolaborasaun di’ak entre komunidade ho autoridade seguransa hodi kontrola tabaku, vendedór tabaku ilegál sei barak mak sirkula iha Oé-Cusse,” Belarmino da Rosa, aprezenta iha ámbitu sensibiliza dekretu-lei númeru 14/2016, kona-bá rejime kontrolu tabaku iha salaun administrasaun Numbei, kuarta ne’e.
“RAEOA sai hanesan área risku boot ba kazu ilegál sira, tanba geografikamente iha fronteira ne’ebé luan, seguransa la konsege kobre tanba menus rekursu umanu,” Inspetór Xefe Polísia, Belarmino da Rosa hateten.
Nia subliña, kona-bá PNTL lejizlasaun ba tabaku, iha dekretu-lei númeru 14/2016, sita kona-bá kontrolu tabaku, no vendedór sira-nia devér atu kumpri.
“Lei ne’e nia prezensa atu regula infratór sira, bele la kumpri lei kontra-bandu no krime sira, tanba ne’e direitu no devér atu kumpri lei no orden, ne’ebé hanaran devér kontributivu, tanba Konstituisaun fó dalan ba PNTL hodi kontrola infratór sira-ne’ebé kontra lei no bandu,” nia katak.
PNTL nia kna’ar atu defende legalidade demokrátiku no halo prevensaun ba krime sira-ne’ebé konsagra iha konstituisaun RDTL, iha artigu-147, bazea ba dekretu-lei númeru 14/2016, loron 08 fulan-juñu, iha artigu 32, fó kompeténsia ba PNTL atu asegura rejime kontrolu tabaku.
“PNTL hala’o nia funsaun no halo asaun bazea ba lei, kontrola fatin ne’ebé juridikamente proibidu atu fuma, no kontrola hodi hola medida ba sigarru ne’ebé tama ilegalmente, maibé problema maka menus rekursu umanu,” nia subliña.
Maibé asaun PNTL nian ba futuru, bainhira iha infrasaun maka PNTL sei uza baze legál sira hodi halo apreensaun ba sasán kontra-bandu hodi prosesa tuir lei ne’ebé vigora.
Tán ne’e, nia husu kolaborasaun di’ak ho parte kompetente hodi pasa revista ba sasán ne’ebé tama s ai área jurídiku RAEOA nian.
“Atu identifika fatin transasaun ilegál ka sasán kontra-bandu sira, PNTL no autoridade kompetente sei halo operasaun iha liña fronteira, no área juridiku RAEOA hodi identifika sasán kontra-bandu, depende ba forsa ne’ebé iha,” nia informa.
Entretantu distánsia área fronteira iha Oé-Cusse hamutuk kilómetru 142 hosi Wini to’o fronteira Naktuka Oépoli, Oésilo no Pássabe, no daudaun ne’e membru efetivu PNTL ativa iha komandu Oé-Cusse hamutuk na’in-124.
Notísia relevante: Membru PNTL na’in-12 iha Oé-Cusse tama idade reforma
Jornalista: Abílio Elo Nini
Editór: Evaristo Soares martins
