Estrada aat iha Lour, Governu seidauk normaliza
BOBONARO, 19 outubru 2023 (TATOLI)-Governu liuhosi Ministériu Obras Públika to’o ágora seidauk normaliza kondisaun estrada balun a’at iha suku Lour, Postu administrativu Bobonaro, Munisípiu Bobonaro ne’ebé hetan estragu grave hafoin akontese udan-bo’ot iha 13 fulan jullu 2023.
Xefe suku Lour, Miguel Lopes Gomes, hateten estrada ne’e a’at hahú hosi sede suku ba to’o Aldeia Galitas ho totál metru 70 bazeia levantamentu dadus hosi diresaun Servisu Munisipál Obras Públika, Munisípiu Bobonaro.
Nia konfirma, hafoin hetan estragu hato’o kedas proposta eskrita no verbál ba Prezidente Autoridade Munisípiu Bobonaro, atu hatutan ba Ministériu kompetente hodi halo intervensaun.
Notísia relevante:Dezastre naturál estraga uma 21 no estrada iha Lour
“Iha momentu ne’ebá sira resposta dehan tempu badak ,atu eleisaun halo ona normalizasaun, maibé até à data, seidauk halo nnormalizasaun; ida ne’e kondisaun grave. Karik la grave, ami autoridade suku organiza komunidade sira hadi’a ho liman, maibé ita-nia kbi’it la to’o tánba estrada hirak ne’e grave totál ” nia informa ba Jornalista Tatoli, Vía telefónika, kinta ne’e
Autoridade lokál ne’e haktuir, foin lalais ne’e Ministériu Obras Públika, haruka kompania Hugu Amor Unipesoál Lda, halo normalizasaun Estrada kotu; pontu tolu hosi área Lepo liga ba suku Lour.
Iha momentu ne’ebá Xefe suku Miguel tenta husu ajuda ba kompañia Hugu Amor, atu halo normalizasaun ba estrada liga ba aldeia Galitas ne’e.
“Ita-nia diretór Kompania ne’e dehan, labele tánba volume servisu mak bo’ot Liu; grave tebes. Ne’ebé, nia dehan kompeténsia governu nian tanba servisu ne’e todan tebes”Xefe suku ne’e konta tuir.
Ligadu ho problema ne’e, Xefe suku Lour, husu ba Primeiru Ministru, Kayrala Xanana Gusmão, espesialmente Ministru Obras Públika, Samuel Marçal, atu orienta Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI, I.P) halo intervensaun imediata molok Eleisaun Suku.
“Se la Mai halo normalizasaun signifika bele halo atrazu ita-nia Eleisaun Suku ne’ebé mak semana oin ita sei realiza,” nia konsidera.
Suku Lour iha aldeia haat mak hanesan; Tazgolo, Helikei, Olo-Olo no aldeia Galitas ho totál populasaun 1,440, komposta hosi feto 725 no mane 725, mai hosi uma-kain 200 ho xefe família 315.
Notísia relevante:Obra Públika Bobonaro sei halo levantamentu ba kondisaun estrada Lour
Jornalista: Sergio da Cruz
Editór: Rafael Ximenes de A. Belo
