DILI, 19 outubru 2023 (TATOLI)—Sekretáriu Estadu Arte no Kultura (SEAK), Jorge Soares Cristovão, hateten SEAK empodera ekonómia feto liuhosi dezenvolve soru tais hosi grupu soru tais ba iha merkadu nasionál no internasionál.
Notísia Relevante: SEAK apoiu ona grupu soru tais 37 iha 2022
“Atividade hosi forum tais ida-ne’e hetan apoiu hosi ita-nia parseru internasionál sira hanesan UN WOMAN ne’ebé mak servisu hamutuk ho Timor AID ho Fundasaun Alola hodi fo kapasitasaun no formasaun ba grupu soru-na’in sira. Enkoraja sira no empodera ekonomia feto oinsá mak sira dezenvolve sira-nia soru tais ne’e,” Governante ne’e hateten ba jornalista sira hafoin halo abertura ba atividade forum tais 2023, hodi hakbiit feto iha soru tais, iha Sentru Formasaun João Paulo II, Comoro, kinta ne’e.
Iha atividade forum tais 2023 ne’e hetan partisipasaun hosi soru-na’in sira hosi munisípiu Baucau, Bobonaro, Covalima, Lautém, RAEOA no Viqueque.
Servisu ida-ne’e la’o tiha ona durante tinan tolu nia laran, tanba servisu hamutuk UN WOMEN ho Timor AID no Fundasaun Alola ne’ebé sei termina iha fulan-marsu tinan oin, tanba ne’e mak ohin halo avaliasaun ida iha forum ida-ne’e hodi haree sira-nia dezempeñu no sira-nia difikuldade ne’ebé sira hasoru iha soru nian.
Diretora Ezkutiva Fundasaun Alola, Maria Imaculada Guterres, hateten atividade ohin bolu forum tais ba iha rede soru-na’in nian ba tinan ida-ne’e.
“Soru-na’in sira-ne’e maihosi munisípiu ne’en ne’ebe mak ita estabelese ona grupu soriu tais, no iha grupu ne’e rasik hanesan iha Oé-Cusse, Covalima, Lautém, Baucau, Viqueque no Bobonaro. Membru sira-ne’e halibur hamutuk iha ne’e atu hato’o sira-nia mudansa pozitivu ne’ebé mak sira hetan ona durante ne’e. Ita apoia ho parseria serbisu hosi Fundasaun Alola ho Timor Aid ne’ebe mak hetan apoiu másimu husi UN WOMAN,” nia dehan.
Programa ida ne’e hahú iha 2019 no sei ramata iha tinan 2024, entaun ho ida-ne’e mak objetivu atu empodera sira no oinsá mak hakbiit grupu soru-na’in sira hodi bele halo mós advokásia iha sira-nia servisu rasik, liuliu produtu sira-ne’ebé mak iha no oinsá empodera sira hodi hakbiit ekonómia grupu soru tais ne’e.
“Ida-ne’e nia objetivu boot ida mak atu haree ba prezervasaun produsaun kultura liuliu ba produsaun tais hanesan kultura Timor Leste nian. Sira mós establese ona rede soru-na’in hanaran “ita mak rede” ne’ebé mak estabelese ona iha Pateo. Hosi rendimentu loza ne’e hahú hosi 13 agostu to’o 15 outubru 2023 ne’e hetan ona rendimentu totál liu rihun $14. Ida-ne’e kompostu hosi produtu ne’ebe mak mai hosi grupu soru-na’in hamutuk 13 ne’ebé mak estabelese ona iha munisipiu neen,” nia dehan.
Reprezentante UN Woman iha Timor Leste, Nishtha Satyam, hateten SEAK ne’ebé mak marka prezensa hodi loke mós abetura ba progarama forum soru tais ne’e, tanba ho prezensa fó valór no mós ba Fundasaun Alola no Timor Aid ne’ebé mak iha espíritu boot foti ona jornada naruk ida-ne’e atu oinsá lori aumenta tan tais ba mundu.
“Entaun, ho soru tais ne’e ita iha de’it fulan rua, ita loke loza husi dia 14 agostu to’o 14 outubru, ita hetan ona rihun $14,” nia hateten.
Kordenadora Soru-Na’in hosi munisipiu Baucau, Lucia Ximenes, sente kontente tanba hanesan soru-na’in ne’e odamatan nakloke ona ba sira atu halo atividade soru tais no bele faan iha merkadu.
“Ami husu Governu kontinua nafatin ho programa soru tais ne’e no labele to’o iha ne’e de’it, tanba ami soru-na’in ne’e hanesan interna hosi kultura Timor nian rasik,” nia hateten.
Notísia Relevante: Tais sai patrimónia mundiál, SEAK fó prioridade apoia grupu soru tais
Jornalista : Osória Marques
Editór : cancio Ximenes
