DILI, 20 outubru 2023 (TATOLI) – Institutu Apoiu Dezenvolvimentu Emprezariál (IADE), iha sesta ne’e, entrega fundu hamutuk $207.646 ba empreza lokál selesionadu na’in-22 ba programa inkubasaun negósiu hodi finansia no reforsa atividade negósiu,
Diretór Ezekutivu IADE, Filomeno Marcelino Belo, hateten programa ne’e nu’udar apoiu programa fasilidade inkubasaun negósiu ho objetivu atu apoiu emprezáriu sira husi negósiu ki’ik no mediu hodi mellora sira nia-investimentu.
“Empreza selesionadu ne’ebé iha direitu hetan fundu ne’e, antes ne’e iha ona atividade negósiu, tanba ne’e Governu presiza fó apoia hodi sai ezemplu ba sira seluk no inspira joven hodi hili vida emprezariál hanesan dalan ida atu hadi’a ekonomia,” hateten Diretór Ezekutivu IADE ne’e iha ámbitu seremónia entrega fundu operasionál, ekipamentu no materiál ba mediu no pequeno empreza, iha salaun IADE, Bebora.
Notísia relevante: IADE fó formasaun área pekuária ba grupu negósiu iha Covalima
Diretór ne’e husu ba empreza ne’ebé sai benefisiáriu atu utiliza fundu ho di’ak hodi dezenvolve negósiu, nune’e bele finansia ekonomia no ema seluk liuhosi atividade no produtu sira.
Empreza kuaze 50-resin mak kompete iha programa inkubasaun negósiu ne’e, maibé empreza na’in-22 mak sai selesioandu hodi iha direitu asesu ba fundu ne’e.
Tanba empreza benefisiáriu liuhosi prosesu naruk tebes, hanesan hahú hosi submete proposta ba IADE no ekipa ba halo avaliasaun, hafoin lori rezultadu avaliasaun ba ekipa téknika sira, katak negósiu empreza ne’e merese duni hetan apoia ka la’e, bainhira merese duni entaun parte administrasaun akompaña hodi halo planu negósiu, nune’e bainhira merese duni, na’in ba empreza aprezenta planu negósiu ba xefia sira atu deside hodi aprova.
Nune’e, bainhira aprova tenke trata dokumentu legál sira hodi nune’e bele realiza prosesu aprovizionamentu atubele halo pagamentu.
Kritéria dahuluk ba empreza atu hetan direitu ba fundu maka ninia negósiu tenke eziste nanis, produtu tenke úniku, tenke iha inovasaun no iha merkadu rasik ba produtu.
Empreza benefisiáriu agradese ba Governu
Iha biban hanesan, Emprezáriu Cándida Belo, hateten lori empreza nia naran agradese ba Governu liuhosi IADE, ne’ebé durante ne’e akompaña prosesu.
“Agradese ba apoiu IADE no Ministériu Agrikultura no Peska, tanba fó apoio atu halo luan fahi luan hodi haki’ak barak tan”, nia agradese.
Empreza ne’e, hahú haki’ak fahi ba nesessidade doméstika husi 2006, maibé komesa aumenta to’o agora, nune’e bainhira fa’an fahi-oan sira ne’e entre $150 to’o 250 ho rasa fahi Timor ho Makau.
Nune’e nia konsidera apoiu ne’e útil tebes tanba bele hamoris hikas espíritu empreendedorizmu iha sira-nia negósiu tanba ne’e sei utiliza no implementa ho responsabilidade fundu atu garante negósiu bele la’o di’ak no iha sustentabilidade.
“Ha’u husu ba joven sira atu investe mós área produtiva sira, labele hakarak bá de’it servisu iha estranjeiru”, nia afirma.
Empreza benefisiáriu sira mak hanesan CIVANI Unip. Lda, Keyklin Unip. Lda, Floresti Unip Lda, ANG Matime Unip Lda, Rizaldu Enin, Celcan Enin, T&CR2 Tina Enin,Arjomosa Enin, Filona Chorico Enin, Felicia F. Guterres, Marco’d Freitas. Unip. Lda, Nifajajomar, Enin, Betesda Motor, Enin, Tomsores Masto, Enin, Zinimebi, Unip. Lda, Flaciabel, Enin, Lisatutu Farm, enin, Beto Rebo, Enin, Marekonilla Unip. Lda, Dortyjon Taylor, Enin no Silva Santan Unip. Lda.
Fundu $207.646 ne’e kada empreza lokál hetan fundu entre $6.300 to’o $12,300 atu hadi’a liután sira nia investimentu ka reforsa sira negósiu.
Emprezáriu hirak ne’e investe ona iha área produtividade sira hanesan pekuária, agríkula, akuakultura, inklui negósiu hanesan alfaiate, restaurante, Guest house no padaria ne’ebé eziste iha munisipiu Baucau, Dili, Ermera, Liquiça, Lautem no Viqueque.
IADE realiza kompetisaun planu negósiu inovativu setór turizmu 2022
Jornalista: Jesuína Xavier
Editor : Florencio Miranda Ximenes
