DILI, 20 outubru 2023 (TATOLI)-–Ministra Finansa, Santina Viegas Cardoso, konsidera dadus estatístika ne’ebé prodús hosi Institutu Nasionál Estatístika Timor-Leste, Institutu Públiku (INETL, I.P) importante tebes tanba bele ajuda Ministériu Finansa (MF) halo analiza ba orsamentu ne’ebé instituisaun sira submete ba elaborasaun roposta Orsamentu Jerál Estadu (OJE).
“United Nations Population Fund (UNFPA) informa katak saúde materna Timor-Leste daudaun presiza tau-atensaun, maibé ministériu tau orsamentu ki’ik hela. Ha’u hanoin katak loos duni, Ministériu Finansa distribui de’it pakote ba ministériu sira maibé tenke halo analiza ba orsamentu ne’ebé ministériu sira submete, no Ministériu Finansa presiza tau prioridade. Ezemplu saúde materna, saúde labarik, nutrisaun, buat sira ne’e hotu importante tebes maibé dalaruma ita la uza dadus sira ne’e ho didi’ak, ita haree de’it distribuisaun populasaun maibé nesesidade populasaun la hanesan,” Ministra Santina hateten bainhira partisipa iha selebrasaun loron mundiál estatístika, ne’ebé hala’o iha salaun INETL, I.P, Caicoli, kinta ne’e.
Notísia relevante : Sensu agríkola 2019: propriedade agríkola família boot liu maka Bobonaro
Nune’e, governante ne’e husu ona ba jerente institutu atu halo aprezentasaun ida ba membru Governu tomak hodi partilla dadus ne’ebé iha inklui fornese dadus sira ba ministériu relevante sira.
Aleinde ne’e, ba oin INETL, I.P hamutuk ho Diresaun Planeamentu no Orsamentu bele prepara no analiza didi’ak nesesidade sira bainhira instituisaun ruma prepara planu no orsamentu.
“Entaun atu hatene situasaun populasaun ne’e, fonte importante ne’ebé fasilita entidade Estadu sira maka dadus estatístika. Atu nune’e bele elabora planu no programa sira iha OJE hodi benefisia ba povu,” nia subliña.
Tuir Santina, dadus hanesan xavi importante ba planu no preparasaun dezenvolvimentu nasaun.
Produtu estatístika nasionál iha setór oin-oin ne’ebé durante ne’e INETL, I.P prodús ona maka sensu populasaun no uma-kain tinan 2004, 2010, 2015 no 2022, sensu agríkola tinan 2019, peskiza kiak 2001, 2007, 2014, peskiza demografia saúde Timor-Leste tinan 2003, 2010 no 2016 (planu 2024), peskiza forsa traballu tinan 2003, 2016 no 2021, peskiza emprezariál anuál desde 2010 hodi kontribui ba produtu internu brutu.
Nune’e, publikasaun rutina maka Timor-Leste no munisípiu ein númeru, monta nasionál anuál, dadus komérsiu mensál no anuál, dadus kriminál sira, indikadór estatístika trimestrál, inklui índise presu konsumidór (IPK) mensál.
Jornalista : Antónia Gusmão
Editora : Julia Chatarina
