DILI, 06 Outubru 2025 (TATOLI)-Komisaun G iha Parlamentu Nasionál ne’ebé trata Asuntu Edukasaun, Juventude, Desportu, Kultura no Sidadania solisita ba Governu atu ko’alia ho Indonézia hodi solusiona preokupasaun estudante timoroan nian kona-ba estensaun vistu.
Vise-Prezidente Komisaun G, Gabriel Soares, dehan foin lalais hala’o enkontru ho estudante timoroan ne’ebé daudaun estudu iha Indonézia no hato’o kestaun referida.
Hodi husu atensaun Governu, tanba estudante balun foti lisensiatura maibé vistu la to’o tinan maka difikulta sira tenke bá-mai trata.
“Se bele Governu rai rua halo akordu ida [katak] lisensiatura vistu ba tinan haat, mestradu rua no doutoramentu tolu”, nia hato’o liuhusi reuniaun plenária Parlamentu, ohin.
Vise-Ministru ba Asuntu Parlamentár, Adérito Hugo, rejista preokupasaun ne’e no sei enkamiña ba ministériu tutela.
Lembra katak, iha 05 Marsu 2025, Ministru Ensinu Superiór, Siénsia no Kultura (MESSK), José Honório, ho nia omólogu indonéziu, Brian Yuliarto, ko’alia ona kona-ba pontu importante neen.
Iha pontu neen ne’ebé sira ko’alia idam kona-ba fasilita estudante timoroan sira atu hetan vistu estudante (KITAS), nune’e mós estensaun durasaun vistu estudante nian (lisensa atu hela ba estudante timoroan sira iha Indonézia). Purezemplu, durasaun vistu estudante ba lisensiatura nian bele fó tinan haat duké tinan ida, no estudante mestradu nian tinan rua no estudante doutoramentu tolu.
Notísia relevante: TL-Indonézia diskute progresu kooperasaun bilaterál iha área Edukasaun
Jornalista: Nelson de Sousa
Editora: Maria Auxiliadora
