VIQUEQUE, 21 outubru 2023 (TATOLI)—Administradór munisípiu Viqueque, Januário Soares ‘Bolly’, enkoraja emperezáriu iha Viqueque hodi hola parte iha prosesu dezenvolvimentu iha munisípiu Viqueque.
“Ohin Kámara Komérsiu Indústria munisípiu Viqueque kompleta ona estrutura hodi bele sai organizasaun emprezariál ne’ebé forte no nu’udar parseiru Governu inklui munisípiu Viqueque. Tanba ne’e, ha’u husu emprezáriu sira iha munisípiu Viqueque hodi responde ba dezenvolvimentu sira iha Viqueque, prontu hasoru dezafiu no oportunidade sira atu ita hola parte ba dezenvolvimentu sira,” Autoridade munisipál hato’o asuntu ne’e hafoin ramata fó pose ba estrutura Kámara Komérsiu Indústria Timor-Leste (CCI-TL, sigla portugés) Viqueque, iha salaun Luminár, Beloi, sábadu ne’e.
Administradór dehan, la kleur tan Timor Leste sai membru plenu Asosiasaun Nasaun Sudeste Aziátiku (ASEAN, sigla inglés) ne’ebé kompetisaun entre empreza sai boot liután iha área komérsiu.
“Tanba ne’e, ha’u husu empreza sira, liu-liu Viqueque-oan tenke esforsu-an hodi apreende nune’e bele kompete ho emprezáriu sira seluk ne’ebé mai hosi rai-li’ur,” nia hato’o.
Notísia relevante : CCI-TL hahú mobiliza emprezáriu investe iha setór agrikultura hodi hamenus importasaun
Iha fatin hanesan, Prezidente CCI-TL Viqueque, Florêncio Armindo da Concieção G. da Costa, hateten, estrutura tenke kaer liman hamutuk hodi kompete ho emprezáriu sira hosi internasionál sira ne’ebé investe iha Timor Leste no kontribui ba prosesu dezenvolvimentu.
“Ohin ha’u-nia maluk emprezáriu sira simu pose, tenke fó liman ba malu hodi partisipa no kontribui ba rai doben Timor-Leste, espesiál iha munisípiu Viqueque, tanba konfiansa ne’ebé tula ba ha’u hodi organiza setór privadu sira sai parseiru Governu. Tanba ne’e, ita hamutuk ho hanoin no neon ida hodi rezolve ita-nia munisípiu Viqueque, atu prepara-an hodi kompete ho emprezáriu internasionál,” nia tenik.
Biban ne’e, nia husu emprezáriu sira atu esforsu-an hodi nafatin kria unidade nu’udar atu kontribui ba dezenvolvimentu.
Estrutura CCI-TL Viqueque estabelese liuhosi asembleia ne’ebé realiza iha fevereiru 2023. Nune’e, Florêncio Armindo fó pose ba membru hamutuk 30 resin, ba mandatu 2023 to’o 2027, kompostu hosi Vise-Prezidente inklui Divisaun sira seluk.
Serimónia tomada pose akompaña hosi Administradór munisípiu Viqueque, Diretór munisípiu Viqueque no emprezáriu sira
Jornalista : Vitorino Lopes da Costa
Editora : Julia Chatarina
