OÉ-CUSSE, 23 outubru 2023 (TATOLI – Diresaun Rejionál Agrikultura, liuhosi Departementu Pekuária aloka rihun $43,675.03 hodi harii konstrusaun foun ba uma klínika saúde animál iha aldeia Maquelab suku Taiboko sub-rejiaun Pante Makasar ,RAEOA.
Notísia relevante: Planu Nasional Ordenamentu Territoriál define RAEOA no Atauro sai produsaun pekuária no turístika
Xefe Departementu Pekuária, Cipriano Agustinho Daos, hateten, rezultadu aprovizionamentu anúnsia ona, kompañia Fonicum Unipesoál Lda mak sei ezekuta, maibé seidauk selebra kontratu hodi halo iha aldeia Maquelab suku Taiboko.
“Klínika ba animál ne’e, atu tau ekipamentu no medikamentu vasina sira, liu-liu ba ai-moruk, tanba durante ne’e, ita uza fatin ida iha diresaun maibé temporáriu de’it, tan ne’e maka, iha tinan ne’e ita propoin hodi halo sentru ida,” Cipriano Agustinho Daos, hateten, iha Oé-Cusse, segunda ne’e.
Nia informa, bainhira konstrusaun konklui sei fasilita atendimentu ba animál sira iha sub-rejiaun Nítibe perténsia tasi-ibun nian, tanba iha Nítibe parte leten harii ona klínika ida Faotbena.
“Vásina ba animál sira-ne’e tenki tau iha fatin ho suhu 2 to’o 8 derajad selsius, sei ita la harii tán ida iha ne’ebá, movimentu vasinasaun ba sub-rejiaun sira liga ba suku distánsia do’ok,” ezekutivu ne’e informa.
Tuir nia, daudaun ne’e klínika ba animál ejiste iha Oé-Cusse hamutuk tolu (3), ida iha sub-rejiaun Oésilo harii iha aldeia Sifin suku Usitasa’e hodi atende ba Oésilo to’o sub-rejiau Pássabe, ida harii iha sub-rejiaun Nítibe hodi atende iha área parte leten, agora mak atu harii tán ida iha suku Taiboko hodi atende ba parte Nítibe tasi-ibun mai to’o sub-rejiaun Pante Makasar.
“Ai-moruk sira-ne’e atu vasina ba animál sira hanesan karau, kuda, fahi, bibi to’o manu, tanba vasina tenki tau iha fatin ne’ebé seguru,” nia katak.
Notísia relevante:Pekuária RAEOA vasina ona karau 819
Jornalista: Abílio Elo Nini
Editór: Evaristo Soares Martins
