iklan

BOBONARO, MUNISÍPIU

AMB diskute kona-ba preparasaun interkámbiu festivál kulturál

AMB diskute  kona-ba preparasaun interkámbiu festivál kulturál

Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO,24 outubru 2023 (TATOLI)-Prezidente Autoridade munisípiu Bobonaro, Ernesto de Oliveira Barreto, tersa ne’e,  halo enkontru ho instituisaun relevante sira hodi diskute kona-ba preparasaun eventu interkámbiu kulturál fronteira ne’ebé sei realiza iha loron 15 to’o 18 fulan-novembru tinan 2023.

Ernesto de Oliveira Barreto, hateten diskusaun ne’e importante tebes tanba eventu ne’e governu sentrál entrega ona responsablidade másimu ba autoridade munisípiu Bobonaro atu organiza ho di’ak.

“Ita-nia enkontru ida ohin ne’e ko’alia kona-ba interkámbiu kulturál ne’e,  preparasaun tenke di’ak, tanba ne’e,  eventu ita bele dehan internasionál keta halo Governadór NTT, Bupati sira mai hotu, entaun ita-nia preparasaun tenke másimu,”Nia hateten iha ninia intervensaun durante sorumutu ne’e iha salaun enkontru administrasaun munisipál Bobonaro

Notísia Relevante:Interkámbiu festivál kulturál fronteira sei hala’o iha Maliana

Durante enkontru ne’e, Autoridade Munisípiu Bobonaro hamutuk ho instituisaun relevante diskute liuliu atu oinsá instala sub-komisaun organizadora hodi reajusta ho komisaun organizadora hosi nasionál, ko’alia kona-ba seguransa no preparasaun ba akomodasaun inklui lojístika.

Governu Sentrál hatuun ona orientasaun hahú tersa ohin ba oin,  autoridade munisípiu Bobonaro tenke orienta administradór postu sira atu oinsá aviza  ninia komunidade sira iha kapitál Maliana hodi hamoos fo’er iha uma oin no estrada ninin sira.

Nune’e mós atu koordena ho komersiantes  lokál no estranjeiru sira atu ida-idak pinta loja, kioske no restaurante sira hodi garante ambiente moos no seguru.

“Agora imi tenke aviza la’o haleu bainrua, bain-tolu ita la’o ba hare fali, la’o ka lae negosiante sira hakarak ka lakoi tenke hala’o, se lakoi tenke taka nia loja no kontratu iha fatin seluk,tanba ne’e imajen nasaun, imajen munisípiu Bobonaro, hakarak lakoi tenke halo tuir tama iha dia 10 ne’e Maliana laran tenke nabilan hotu ona,”Nia hateten.

No orienta funsionariu sira atu uja tais iha eventu ne’e hodi promove identidade kulturál Timor nian.“Se laiha tais bele tau kazaku tais, kahe selendang tais, tanba ne’e,  ita-nia kultura hakarak ka lakoi ita tenke uza para ita-nia vizinu sira mai hare ne’e ita uniforme ho tais ne’e furak oituan,”Nia hateten.

Iha fatin hanesan reprezentante hosi  Diretór Jerál Sekretáriadu Estádu Arte no Kultura, Eugenio Sarmento, releta katak sira halo ona koordenasaun ho autoridade postu, suku no lia-na’in Fatululik kona-ba oinsá prepara atu simu bainaka sira iha pontu entrada Balibo.

“Objetivu hosi simu matak malirin ne’e, atu buat hotu la’o ho di’ak, karreta labele baku-fila,ita ema labele hetan dezastre, moras, konvidadus sira mós tenke  kontenti liu-liu ba maluk sira ne’ebé dalaruma keta nega tia labele mai Timor, sira mai fali bele bele hetan dezastre,entaun mai simu matak malirin para fila ho diak”Nia dehan

Programa interkámbiu kulturál ne’e ho ninia objetivu maka atu promove rekonsiliasaun entre timoroan sira-ne’ebé oras ne’e hela iha Timor Osidentál ho Timoroan sira-ne’ebé hela iha Timor-Leste.

Sekretariu Estadu Arte o Kultura (SEAK) implementa programa ne’e bazeia ba rekomendasaun hosi Komisaun  Amizade Verdade (CVA) atu promove rekonsiliasaun liu hosi atividade kulturál hodi hametin liután amizade entre Timoroan sira ho nia maluk sira hosi nasaun vizinu Nusa Tenagara Timur (NTT) Indonezía

Enkuantu,  sekuénsia hosi serimónia ne’e, dahuluk sei hahú simu matak-malirin tuir lisan Timor-Leste iha Balibó, vizita sítiu istóriku, inaugurasaun movimentu liberdade, sei halao’o mós semináriu koletiva hosi memoria esperansa, desportu rekonsiliasaun ne’ebé sei realiza iha Atambua, talk show, aprezentasaun arte no kultura, konsertu múzika hosi artista timoroan sira no mós atividade semináriu no seluk tan ho prezensa bainaka kuaze 500.

Notísia Relevante:SEAK koordena ho RAEOA partisipa festivál kulturál fronteira

Jornalista: Sergio da Cruz

Editór: Agapito dos Santos

iklan
iklan

Leave a Reply

iklan
error: Content is protected !!