BAUCAU, 24 outubru 2023 (TATOLI) – Komisaun Nasionál Eleisaun (CNE, sigla Portugés) garante, prosesu eleisaun órgaun suku sei la’o ho transparansia iha munisípiu Baucau.
Diretór CNE Munisípiu Baucau, Esmeraldo Damião Belo, esplika, nu’udar órgaun supervisor, sei tau-matan ba prosesu hotu kona-ba eleisaun suku hanesan preparasaun, transportasaun materiál hosi nasionál, pakotementu, distribuisaun ba sentru votasaun, eleisaun no rezultadu.
“Hosi númeru ofisiál supervizaun ne’ebé CNE prepara, ha’u bele dehan bele garante ona eleisaun ne’e la’o ho susesu,” Diretór CNE Baucau informa ba Agência TATOLI iha vila nova, Baucau, tersa ne’e.
CNE nafatin kolabora ho Sekretáriu Tekniku Admistrasaun Eleitóral (STAE) munisípiu Baucau nune’e bele fó susesu ba prosesu eleisaun órgaun suku.
CNE iha limitasaun transporte nune’e prosesu pakotementu reprezentante ofisiál supervizaun kada postu na’in-lima to’o remata no sei fó tutan rezultadu ba ofisiál sira seluk hodi hatene materiál sensitivu no naun-sensitivu kada sentru votasaun.
“Materiál sira horseik to’o ona, agora kontinua halo pakotementu ne’ebé akompaña mós hosi ita-nia ofisiál supervizaun sira,” Diretór CNE Baucau informa.
Antes ne’e, CNE Baucau halo rekrutamentu ba ofisiál supervizaun hamutuk 283 kompostu na’in rua, sei apoia iha eskritóriu no na’in-281 sei destaka iha kada sentru votasaun hosi postu administrativu neen, suku 59 no aldeia 281.
Entretantu tótal kandidatura xefe suku iha Baucau hamutuk 243 kompostu feto nain-26 no mane nain-217 ho tótal votante hamutuk rihun 99 resin.
Notísia relevante:Kandidatu xefe suku feto na’in lima hosi postu Baucau sei kompete iha eleisaun suku
Jornalista : Natalino Belo
Editór : Rafael Ximenes de A. Belo
