BAUCAU, 23 outubru 2023 (TATOLI) – Kandidatu xefe suku feto na’in lima sei kompete ho kandidatu xefe suku mane hamutuk na’in-45 iha Eleisaun Komunitária, iha Postu administrativu Baucau vila, munisípiu Baucau.
Postu administrativu Baucau vila hamutuk suku 11. Kandidatu xefe suku na’in-50 ne’e kompostu husi suku Bahú nian-6, Bucoli rua (2), Buibau haat (4), Buruma tolu (3), Caibada neen (6), Gariuai ualu (8), Samalari haat (4), Seiçal 3, Tirilolo haat (4), Triloka hitu (7) no Uailili hamutuk na’in tolu (3).
Administradór postu admistrativu Baucau vila, Isencinio António da Silva, esplika, kandidatura feto na’in-lima refere maihosi suku Bucoli na’in-ida, Triloka nian-rua, Bahú nian-ida no suku Seiçal na’in-ida.
“Eleisaun ida-ne’e ninia natureza eleisaun komunitária, kria ambiente pás, di’ak no demokrasia liu tanba ema hotu-hotu bele kandidata aan hodi kompetisaun,” Admistradór postu Baucau vila hateten iha Vila nova, segunda ne’e.
Isencinio da Silva iha esperansa bainhira kada kandidatura eleitu ona nu’udar xefe suku bele ona hamutuk ho administrasaun postu Baucau fila kontribui ba malu hodi fó ideia konstrutiva hodi dezenvolve Baucau vila.
“Fiar katak ema ne’ebé kandidata aan ne’e potensiál hodi halo dezenvolvmentu iha sira-nia suku,” Isencinio da Silva argumenta.
Postu Baucau vila durante preparasaun ba eleisaun suku liuhosi maneira sosializasaun lei-númeru 9/2016 kona-ba xefe suku liuliu oinsá prosesu atu kandidata aan, kompeténsia lideransa komunitária inklui prosesu hili lideransa tuir kada suku ne’ebé eziste iha postu.
Kandidatura xefe suku iha Baucau hamutuk 243 kompostu mane nain-217 no feto nain-26 kompostu postu administrativu Baguia hamutuk 30, Baucau Vila na’in-50, Laga 28, Quelicai 62, Vemase 30 no Venilale hamutuk nian-52.
Notísia relevante:Livru buletin votu Baucau nian to’o ona, aban halo pakotementu
Jornalista : Natalino Belo
Editór : Rafael Ximenes de A. Belo
