FRETILIN husu disponibiliza dosente área espesializada Peska no Siénsia Mariña UNTL

DILI, 24 outubru 2023 (TATOLI)—Deputada hosi bankada FRETILIN iha Parlamentu Nasionál (PN), Mariquita Soares, husu parte relevante atu disponibiliza dosente área espesializada iha departamentu Peska no Siénsia Mariña, Fakuldade Agrikultura Universidade Nasionál Timor-Lorosa’e (UNTL).
Notísia Relevante: Estudante 600-resin iha Departamentu Peska no Siénsia Mariña ezije dosente iha área espesífika
“Semana kotuk ha’u simu preokupasaun no lamentasaun hosi estudante Departamentu Peska no Siénsia Mariña, fakuldade Agrikultura Universidade Nasionál Timor-Lorosa’e (UNTL), estudante 600-resin ne’ebé ezije retória UNTL tau atensaun no disponibiliza dosente área espesializada ba prosesu ensinu aprendizajen ho kualidade,” Deputada FRETLIN ne’e levanta liuhosi reuniaun plenária PN, tersa ne’e.
Nu’udar reprezentante povu sente triste bainhira rona preokupasaun ida-ne’e katak, rekursu dosente espesializada iha área peska no siénsia Mariña laiha.
Miabé, nia dehan, iha de’it dosente na’in-hitu (7) ne’ebé kompostu na’in-lima ho estatutu kontratadu no na’in-rua ne’e voluntáriu.
Dosente hirak ne’e mesak okupadu ho projetu peskiza oioin hosi Ministériu Agrikultura no Peska (MAP) no survey hosi Prezidénsia Repúblika, tanba ne’e dosente hirak ne’e nia tempu barak liu ba iha viajen hosi munisípiu ida ba munisípiu seluk.
Dosente hirak ne’e kuaze laiha tempu hodi hanorin estudante sira-ne’ebé iha aula, no diretór departamentu Siénsia Mariña fó autorizasaun ba estudante ho estudante mak hanorin ba malu, to’o fó mós valór ba malu tanba de’it falta ka menus dosente.
“Ho preokupasaun no lamentasaun ezijénsia hosi estudante sira ba situasaun ne’ebé sira hasoru halo dosente sira prátika diskriminasaun, ameasa no halo ta’uk hodi intimida estudante sira iha prosesu aprendizajen. Hahalok sira-ne’e la kontribui no la garante kualidade di’ak ba ita-nia oan sira no sei fó impaktu ba sira-nia future,” nia hateten.
Tanba ne’e, Deputada ousi bankada opozisaun ne’e husu ba reitór UNTL hatun despaixu urjente no despaixu hodi hapara estudante ho estudante hanorin malu iha departamentu peska no siensia Mariña, no ba Ministéiru Ensinu Superiór Siénsia no Kultura atu hamutuk ho reitoria atu orsamentu hodi bele disponibiliza dosente espesializada ba área refere no husu halo avaliasaun kle’an ba dosente sira-ne’ebé la ativu halo sira-nia serbisu, nune’e bele solusiona situasaun ne’e ho lalais.
Nia husu ba reitór no estrutura tomak ho sívita akadémika hotu tau kampus iha fatin formasaun líder futuru Timor-Leste nian ne’ebé kualidade, seguru no saudável ne’ebé daudaun la’o hela nune’e fó espasu aprendizajen di’ak ba estudante sira
Tanba, progama IX Governu no planu estratéjiku UNTL opta vizaun ida katak, sentru exelente ba ensinu superior iha Timor-Leste, nune’e hanoin atu atinje vizaun refere tenke garante kualidade ida di’ak iha prosesu ensinu aprendizajen, nune’e sei prodús no forma rekursu umanu kualidade aas.
Vise Ministra ba asuntu Parlamentár, Aderito Hugo da Costa, hateten Governu haree hela ba preokupasaun sira atu bele buka solusaun.
“Kona-ba dosente UNTL, informasaun ne’e Governu akompaña hela kle’ur ona hatene ona oinsá mak halo dosente sira permanente tempu barak liu ba envolve iha peskiza sira duke tau atensaun ba aula iha aktividade universitáriu nian. Tanba UNTL ne’e universidade públiku Estadu nian, ha’u sente Deputadu sira komisaun G bele haree asuntu ne’e ho detallu liután hodi ita bele rezolve. Purtantu, Governu rejista hela asuntu no informasaun ne’e ho di’ak hodi depois haree no sei adianta ba Ministru Ensinu Superiór,” nia hateten.
Notísia Relevante: Departamentu Peska no Siénsia Mariña iha UNTL falta dosente iha área espesífika
Jornalista : Nelson de Sousa
Editór : Cancio Ximenes

